बुढासुब्बा फुटबल प्रतियोगीता चैतमा गरिने तयारी विजेतालाई १० लाख, उपविजेतालाई ५ लाख

धरान । अन्तर्राष्ट्रिय आमन्त्रण बुढासुब्बा टुबोर्ग गोल्डकप फुटबल प्रतियोगीताको २३ औं संस्करण आउँदो चैत २६ देखी २०७९ बैशाख ३ सम्म सञ्चालन गर्न तयारी थालिएको छ । कोरोना महामारीका कारण गतः वर्ष प्रतियोगीता स्थगित भएको थियो । जोखिमको परिस्थिति न्युनिकरण हुँदै आएकाले स्वास्थ्य सुरक्षा मापदण्ड अपनाउँदै यसपाली प्रतियोगती आयोजना गरिने तयारी गरिएको हो ।

आयोजक धरान फुटबल क्लबव्दारा आज मंगलावार विहान आयोजित पत्रकार सम्मेलनमा अध्यक्ष किशोर राईले उक्त जानकारी दिएका हुन् । उनले भने ‘बाइस वर्ष देखी निरन्तर चल्दै आएको बुढासुब्बा गोल्डकपको इतिहासमा गतवर्ष कोरोनाका कारण रोकीदा काठमाण्डू बाहिरको फुटबलनै ठप्प भएको खेलप्रेमीहरुले अनुभव गरे ।’

बुढासुब्बा फुटबलले सरकारी लगानी बिना स्थानिय साधन श्रोत जुटाएर ‘क’ श्रेणिको नेपाली प्रतियोगीताहरुमा इतिहास बनाएको उनले बताए । उनले भने ‘जस्तो सुकै संकटको सामना गरेर भएपनि बुढासुब्बा फुटबलाई हामी निरन्तर दिन्छौ ।’ उनले प्रतियोगीताको आयोजनाले कोरोना महामारीबाट निराश खेलकुद, व्यापार र जनजीवनलाई नयाँ गति दिने विश्वास व्यक्त गरे ।

प्रारम्भिक तयारीका क्रममा २३ औं बुढासुब्बा गोल्डकपमा २ भारतिय फुटबल टिम सहभागी गराइने गृहकार्य भैरहेको बताइएको छ । शहिद स्मारक लिगमा भर्खरै उत्कृष्ट घोषित ३ वटा क्लब, उपत्यका बाहिर मोफसलका २ र आयोजक धरान फुटबल क्यब समेत गरी ८ वटा टिम प्रतियोगीतामा सहभागी गराइने तयारी भएको पत्रकार सम्मेलनमा जारी विज्ञप्तीमा उल्लेख छ ।

धरान उपमहानगरपालिकाले प्रतियोगीता आयोजना गर्न १८ लाख रुपया प्रदान गर्ने निर्णय भएको अध्यक्ष किशोर राईले जानकारी दिए । उनका अनुसार उक्त रकम विजेतालाई १० लाख रुपया, उपविजेतालाई ५ लाख रुपया वितरणमा खर्च गरिने छ । ३ लाख रुपया घरेलु टिम धरान फुटबल क्लबको टोलीलाई पूर्व अभ्यासका लागि खर्च गरिने उनले बताए । मुख्य पुरस्कारको रकम निश्चित भएपछि आयोजकलाई प्रतियोगीता आयोजना गर्न सहज भएको छ ।

यसैगरी उत्कृष्ट खेलाडिलाई १ लाख ५० हजार, म्यान अफ दि म्याच ७० हजार, सर्वाधिक गोलकर्ता २० हजार, उत्कृष्ट प्रशिक्षक १५ हजार, उत्कृष्ट गोल रक्षक, उत्कृष्ट डिफेन्स, उत्कृष्ट मिड फिल्डर र उत्कृष्ट स्ट्राइकरलाई १५/१५ हजार रुपया नगद पुरस्कार प्रदान गरिने बजेटमा उल्लेख छ ।

गोर्खा ब्रुअरीको प्रमुख प्रयोजनमा हुने प्रतियोगीतका लागि सार्वजनिक गरिएको अनुभानित बजेटमा कुल आम्दामी ६६ लाख रुपया अनुमान गरिएको छ । कुल खर्च ५१ लाख ३२ हजार रुपया हुने अनुमान छ । अध्यक्ष राईले भने ‘यो प्रारम्भिक अनुमान हो, नाफा नै हुन्छ भनेर भन्न सकिन्न ।’ कोरोना महामारीका कारण स्थानिय साधन श्रोत जुट्न कठिन छ । उनले गोल्डकपको २२ औ प्रतियोगीतामा प्रदेश १ सरकारले विनियोजन गरिसकेको रकम समेत नदिएको र राष्ट्रिय खेलकुद परिषदले पनि अहिले सम्म रकम भुक्तान नगरेको गुनासो सुनाए ।