विराटनगर भाद्र ४ , जनगायक जेबी टुहुरेको चौथो स्मृति दिवस तथा स्रष्टा सम्मान कार्यक्रम आगामी भाद्र १४ गते शनिबार दिउँसो २ बजे विराटनगरमा हुने भएको छ।
कार्यक्रम विराटनगर–५ स्थित एभरेस्ट सेकेन्डरी स्कुलमा हुनेछ। जेबी टुहुरे फाउन्डेसनको आयोजनामा हुने कार्यक्रममा स्मरण सभासँगै स्रष्टा सम्मानको कार्यक्रम पनि समावेश गरिएको छ।
फाउन्डेसनकी संयोजक निर्भिका टुहुरेले कार्यक्रमबारे जानकारी दिँदै यस वर्ष पनि समाजमा विशिष्ट योगदान पु¥याएका व्यक्तिलाई सम्मान गरिने बताइन्।
यस वर्षको सम्मान छनोट समितिमा राजेश थापा संयोजक रहेका छन् भने सदस्यहरूमा रञ्जित तामाङ, छोटलुंग पोख्वाहांग, मनिष खड्गी, वासिम आलम, शोभा देवी खड्गी राई रहेका छन्।
स्वर्गीय जेबी टुहुरेको नाममा २०७५ सालमा फाउन्डेसन स्थापना गरिएको हो। फाउन्डेसनले स्थापना कालदेखि नै सामाजिक, सांगीतिक तथा साहित्यिक क्षेत्रलाई प्रोत्साहन गर्ने कार्यक्रमहरू गर्दै आएको छ।
को हुन् जेबी टुहुरे ?
१५ कात्तिक २००१ मा धरानको पुरानो बजारमा जन्मिएका जुठबहादुर खड्गीले सानैदेखि गीत गाउन थालेका थिए । २०२१ सालमा पिता कृष्णबहादुर खड्गीको निधन भएपछि आफ्नो नामको पछाडि टुहुरे जोडेका थिए । उनी जेबी टुहुरेकै नामबाट चिनिए । २०२० को दशकदेखि कम्युनिष्ट विचारधारासँग नजिक भएका उनले २०२४ सालदेखि जनताका गीत गाउन थालेका थिए । उनको ‘आमा दिदी बहिनी हो, कति बस्छौ दासी भई …’ निकै चर्तित छ ।
राजनीतिक रुपमा उनको आवद्धता माले, एमाले हुँदै पछिल्लो समय माओवादी केन्द्रमा थिए । दोस्रो संविधानसभामा माओवादी केन्द्रबाट सभासद बनेका उनी जनसांस्कृतिक महासंघका संरक्षक र माओवादीका सल्लाहकार थिए । विराटनगर १२ स्थित बखरीमा रहेको आफ्नो घरमा उनले लामो समय बिताएका थिए ।
Discussion about this post