विराटनगर । करिब नौ महिनादेखि नेतृत्वविहीन बनेको कोशी प्रदेशसभा सचिवालयमा अन्ततः नयाँ सचिव नियुक्त भएका छन्। संघीय संसद सचिवालयका पूर्व सचिव सुदर्शन खड्कालाई प्रदेशसभा सचिवका रूपमा जिम्मेवारी दिइएको हो।
प्रदेशसभा सचिवमा खड्काको नियुक्ति सभामुख अम्बरबहादुर विष्टको सिफारिसमा प्रदेश प्रमुख परशुराम खापुङले गरेका हुन्। संघीय संसद सचिवालयबाट स्वेच्छिक अवकाश लिएका खड्का बुधबार शपथग्रहण गर्ने कार्यक्रम तय गरिएको कोशी प्रदेशसभाका सूचना अधिकारी निरज ढकालले जानकारी दिए।
गत भदौ २४ गते भएको जनआन्दोलनका क्रममा प्रदेशसभाको भवनमा आगजनी र तोडफोड भएपछि सचिवालयलाई कटहरी गाउँपालिका–१, जम्टोकीस्थित कृषि बजार भवनमा स्थानान्तरण गर्ने तयारी भइरहेको छ। अस्तव्यस्त अवस्थाको प्रदेशसभा व्यवस्थापन गर्नका लागि खड्कालाई जिम्मेवारी दिइएको हो। संघीय संसदमा दीर्घ अनुभव भएकाले उनले काममा सहजता ल्याउने अपेक्षा गरिएको छ।
खड्का भक्तपुरको चाँगुनारायण नगरपालिका–४ निवासी हुन्। उनले अर्थशास्त्र र जनप्रशासनमा स्नातकोत्तर र शिक्षाशास्त्रमा स्नातक (बीएड) गरेका छन्। सन् २०२० देखि २०२५ सम्म उनी संघीय संसद सचिवालयमा सचिवका रूपमा कार्यरत थिए। यसअघि भरतराज गौतम महासचिवमा नियुक्त भएपछि उनी बढुवा भएका थिए।
यसअघि सचिवका रूपमा रहेका गोपालप्रसाद पराजुलीलाई पशुपति क्षेत्र विकास कोषको जग्गामा अनियमितता गरेको आरोपमा सर्वोच्च अदालतले ६ वर्ष कैद र जरिवानाको फैसला सुनाएपछि पदमुक्त गरिएको थियो। पराजुली भ्रष्टाचारको दोषी ठहर भएपछि प्रदेशसभा नेतृत्व रिक्त बनेको थियो।
सचिव खड्काले भारत, श्रीलङ्का, जर्मनी, अमेरिका, चीन, थाइल्यान्ड, मलेसिया, सिङ्गापुर र हङकङलगायत देश भ्रमण गरेका छन्। अनुभवी प्रशासकका रूपमा उनी प्रदेशसभालाई सुचारु र व्यवस्थित बनाउन सक्षम हुने विश्वास राखिएको छ।
Discussion about this post