इटहरी । सुनसरीकोइटहरी–१७ स्थित श्री राम जानकी शान्ति वृद्धाश्रममा बस्दै आएका आमाहरुलाई मानव अधिकार तथा शान्ति समाज, सुनसरीले आफ्नो वार्षिकोत्सवको अवसरमा खाद्यान्न सहयोग गरेको छ। समाजका जिल्ला सभापति रोबनराज कार्कीका अनुसार वृद्ध आमाहरूको दैनिकी सहज बनाउन चामल, चिनी र दाल प्रदान गरिएको हो।
कार्यक्रमका प्रमुख अतिथि साहित्यकार टीका आत्रेयले वृद्ध आमाहरूलाई खाद्य सामग्री हस्तान्तरण गर्दै समाजले गरेका मानवीय कार्यहरू प्रशंसनीय रहेको विचार व्यक्त गरे।
वृद्धाश्रम सञ्चालक समितिका सदस्य सन्तोष ओझाका अनुसार आश्रममा हाल १५ जना वृद्ध आमाहरू आश्रित छन्। उनीहरूको स्याहार–सुसारका लागि समितिले दुई जना महिला कर्मचारी नियुक्त गरेर दैनिक रुपमा सेवा सञ्चालन गर्दै आएको छ। उनले सरकारी निकायदेखि विभिन्न दातासम्मले आवश्यकताअनुसार सहयोग गर्दै आएको पनि जानकारी दिए।
यस्तै, सामाजिक सेवा क्षेत्रमा निरन्तर सक्रिय चन्द्र भण्डारीलाई पनि सोही अवसरमा सम्मान गरिएको छ। इटहरीको टेङ्ग्रा खोला किनारका गरिब तथा पिछडिएका बालबालिकालाई लामो समयदेखि निःशुल्क शिक्षा प्रदान गर्दै आएका भण्डारीलाई नगद रु. ७,००१ सहित सम्मान गरिएको हो।
मानव अधिकार तथा शान्ति समाज सुनसरीका सभापति कार्कीको सभापतित्वमा आयोजित कार्यक्रममा प्रमुख अतिथि आत्रेय, केन्द्रबाट सहभागी धना थापा, सम्मानित व्यक्तित्व भण्डारी, केन्द्रीय सदस्य सीतराम कोइराला, जिल्ला सहसचिव मातृका भट्टराईलगायतले समाजले अगाडि बढाउनुपर्ने मानवीय अभियानबारे आफ्ना धारणा राखेका थिए।
समाजले वृद्ध आमाहरूको हेरचाह तथा विपन्न समुदायका बालबालिकाको शिक्षालाई निरन्तर प्रोत्साहन दिने प्रतिबद्धता व्यक्त गर्दै कार्यक्रम समापन भएको थियो।
Discussion about this post