भोक्राहा नरसिंहमा लैंगिक हिंसाविरुद्धको १६ दिने अभियान सुरु

चिराैली । सुनसरीको भोक्राहा नरसिंह गाउँपालिकामा ‘लैंगिक हिंसा विरुद्धको १६ दिने अभियान–२०२5’ औपचारिक रूपमा सुरु गरिएको छ।

गाउँपालिकाकी उपाध्यक्ष सुनिता कुमारी उराँवको अध्यक्षता तथा गाउँपालिकाका अध्यक्ष अजमल अख्तर आजादको प्रमुख आतिथ्यमा बिहीबार आयोजित कार्यक्रमबाट अभियानको शुभारम्भ गरिएको महिला तथा बालबालिका शाखाकी प्रमुख तुलसा निरौलाले जानकारी दिइन्।

उनका अनुसार कार्यक्रमका विशेष अतिथिमा प्रमुख प्रशासकीय अधिकृत विनोद कुमारी अधिकारी, लेखा अधिकृत दिपेन्द्र कुमार चौधरी, वडा अध्यक्षहरू, स्थानीय महिला समूह, सामाजिक अगुवाहरू तथा सरोकारवालाको उपस्थिति रहेको थियो।कार्यक्रममा प्रमुख अतिथि अध्यक्ष अजमल अख्तर आजादले लैंगिक हिंसा अन्त्यका लागि स्थानीय सरकार संवेदनशील र कार्यान्वयनमुखी बन्नुपर्ने आवश्यकता औँल्याए।

उनले सुरक्षित समाज निर्माणका लागि सबैले आ–आफ्नो स्थानबाट सक्रिय भूमिकाको अपेक्षा गरिएको बताएका थिए।

सोही अवसरमा ओरेक नेपालको आयोजनामा सामाजिक सुरक्षा अन्तर्गत व्यक्तिगत घटना दर्ता सम्बन्धी छलफल कार्यक्रम समेत सम्पन्न गरिएको छ। स्थानीयवासीलाई जन्म, मृत्यु, विवाह, बसाइँसराइ जस्ता घटना दर्तामा बढ्दो सचेतना अत्यावश्यक भएको सरोकारवालाले बताएका छन्।

कार्यक्रममा सहभागीहरूले दिप प्रज्वलन गर्दै हिंसामुक्त समुदाय निर्माणको प्रतिवद्धता व्यक्त गरेका थिए।