दुई–दुई सुरक्षाघेरा हुँदाहुँदै तस्करी रोकिएन :

इटहरी । भारत–नेपाल सीमामा पहिलो घेरामा सशस्त्र प्रहरी र दोस्रो घेरामा नेपाल प्रहरी तैनाथ हुँदाहुँदै पनि तस्करी खुलेआम भइरहेको तथ्य बाहिर आएपछि सीमा सुरक्षामाथि गम्भीर प्रश्न खडा भएको छ। हालै इटहरी–१५ झोराहाट क्षेत्रबाट सशस्त्रले लखेटेर समातेको करिब ३० लाखभन्दा बढी मूल्य बराबरको लत्ताकपडासहित मिनी ट्रक घटनाले सुरक्षा संयन्त्रकै विश्वसनीयता विवादमा ल्याइदिएको स्थानीयवासी बताउँछन्।

स्थानीयका अनुसार राति–बेलुका निश्चित समय तालिका अनुसार तस्करी हुने गरेको, नीजि मोटरसाइकल ‘स्कोर्टिङ’मा चल्ने गरेको र मुख्य नाकाबाटै मालसामान भित्रिने गरेको वर्षौंदेखि देखिँदै आएको गुनासो छ। उनिहरू थप्छन्,
“सशस्त्रको बाहिरी घेरा र प्रहरीको भित्री घेरामा कडाइ भए तस्करी सम्भव नै हुँदैन। तर प्रहरी इन्चार्जकै मिलेमतोमा तस्करी सुरक्षित रूपमा गुडिरहेको छ।”

यी आरोपलाई प्रहरी स्रोतले पनि आंशिक रुपमा पुष्टि गरेको छ। एक प्रहरी स्रोतले नाम नखुलाउने शर्तमा भने,
“सीमा क्षेत्रका केही इन्चार्ज र स्थानीय तस्करी समूहबीच ‘अन्डरस्ट्यान्डिङ’ हुने गरेको हामीले पनि सुनेका छौं। नाघ्ने सामान नाघ्नै पाउँछ, थाहा नपाउने तस्करी होइन।”

यता, सशस्त्र प्रहरी बल नम्बर ४ गणले भने तस्करीविरुद्ध कडाइ गरिएको बताउँदै झोराहाटमा गरिएको पछिल्लो अपरेसन त्यसको उदाहरण भएको दाबी गरेको छ।
कमाण्डर मातृका पौडेलका अनुसार, “सूचना–आधारित अपरेशन बढाइएको छ। प्रहरी मिलेमतोका आरोपको सत्यतथ्य छानबिन हुनुपर्छ।”