प्रदेश प्रहरी प्रमुख घिमिरेको कडाइ–सहितको निर्देशन :

विराटनगर । कोशी प्रदेश प्रहरी प्रमुख प्रहरी नायव महानिरीक्षक (डिआइजी) विनोद घिमिरेले प्रदेशभरका जिल्ला प्रहरी प्रमुखहरूसँग भर्चुअल बैठक गर्दै शान्ति–सुरक्षा बलियो बनाउन आवश्यक कडाइका निर्देशन दिएका छन्।

बैठकमा डिआइजी घिमिरेले खुल्ला सीमा, बढ्दो आपराधिक गतिविधि र संवेदनशील राजनीतिक वातावरणलाई ध्यानमा राखी जिल्लाहरूलाई उच्च सतर्कताका साथ प्रहरी परिचालन गर्न आदेश दिए।
उहाँका अनुसार, फरार अभियुक्तको खोजी–कारबाही, अवैध हातहतियार नियन्त्रण, लागुऔषध ओसार–पसार रोकथाम, चोरी–तस्करी नियन्त्रण जस्ता विषयमा विशेष सक्रियता आवश्यक छ।

घिमिरेले मातहतका कार्यालयहरूमा नियमित अनुगमन गर्न, प्रहरी कर्मचारीहरूको पिरमर्का र समस्या सुन्न निर्देशन दिए। उहाँले भने—
“प्रहरीले देखिने र महसुस हुने सेवा दिनुपर्छ। चुनौतीहरूको अध्ययन गर्दै प्रभावकारी रूपमा परिचालन गर्नुपर्छ।”

आगामी निर्वाचन सम्बन्धी सुरक्षा तयारीमा जोड दिँदै उनले अन्य सुरक्षा निकाय, स्थानीय तह, राजनीतिक दल र समुदायसँग सशक्त समन्वय गर्न प्रहरी प्रमुखहरूलाई आदेश दिए।

डिआइजी घिमिरेले प्रहरीको पोशाक, अनुशासन, कार्यालयको स्वच्छता र सुन्दरतामा विशेष ध्यान दिनुपर्ने बताए। साथै, विभागीय नीति–निर्देशनको कडाइका साथ पालना गर्दै, पदअनुरूप जिम्मेवारी निर्वाहमा त्रुटि रहित कार्यशैली अपनाउन पनि उनले निर्देशन दिए।