अन्तर्राष्ट्रिय सम्मेलनको प्रचारप्रसार गर्न विद्यार्थीद्धारा पदयात्रा

इटहरी । नवप्रवर्तन, अनुसन्धान र उच्च शिक्षाको दिगोपनका लागि इटहरीमा सञ्चालित जनता बहुमुखी क्याम्पसले अन्तर्राष्ट्रियस्तरको शैक्षिक सम्मेलन पुस ५ र ६ गते गर्ने भएको छ । अन्तर्राष्ट्रिय शैक्षिक सम्मेलनको प्रचारप्रसारका लागि पूर्वको नाम चलेको धार्मिक स्थल बराहक्षेत्रसँगै आसपासका ऐतिहासिक, धार्मिक तथा पर्यटकीय क्षेत्रमा विद्यार्थीहरुले शनिबार बिहानदेखि साँझसम्म पदयात्रा गरे ।
जनता बहुमुखी क्याम्पस पूर्वकै महत्वपूर्ण शैक्षिक केन्द्रको रुपमा स्थापित भइरहँदा शैक्षिक, व्यवस्थापन, आर्थिक, सामाजिक, साँस्कृतिक, विज्ञान तथा प्रविधि क्षेत्रमा ज्ञानको खोजी गर्नका निम्ति सम्मेलन गर्न लागिएको हो । यसका प्रचारप्रसारका लागि क्याम्पसमा अध्ययन गर्ने विद्यार्थीमध्ये स्नातकोत्तर तह र स्नातक तह चौथो वर्षमा अध्ययन गर्ने विद्यार्थीहरुले बराहक्षेत्रको कोशी पुलबाट थालेको पदयात्रा सप्तपुर, झाक्रीगुप्ता, लालकोटगढीको टुप्पो, अर्चले, बागदलबारी हुँदै हिन्तुपति दरबार र छिन्नामस्ताको मन्दिरसम्म पदयात्रा गरेका हुन् । प्रचारप्रसार समिति संयोजक एवम् स्वतन्त्र विद्यार्थी यूनियनका सभापति सददेव काफ्लेका अनुसार विश्वका विभिन्न देशका नामूद प्रोफेसहरुलाई डाकेर जनता बहुमुखी क्याम्पसको वृहत्तर विकासका लागि यसले एउटा कोशे ढुंङ्गा हुने आशा र अपेक्षाका साथ अन्तर्राष्ट्रिय सम्मेलन गर्न लागेको हो ।
अन्तर्राष्ट्रिय सम्मेलन आयोजक समितिका सदस्य विष्णु कार्कीका अनुसार जनता बहुमुखी क्याम्पस एउटा शैक्षिक हबको रुपमा अगाडि बढाएर लैजाने र प्राज्ञिक थलोको रुपमा विकास गरेर लैजान महत्त्वपूर्ण उपलब्धी हासिल हुनेछ ।

क्याम्पस प्रमुख डा. गीता अधिकारीका अनुसार सम्मेलनमा विश्वव्यापी रुपमा देखिएका ज्ञान तथा तिनका अभ्यासहरूको विषयमा वौद्धिक छलफल र वहस हुनेछ । जनता बहुमुखी क्याम्पसले विशेष गरी कोशी र मधेश प्रदेशका विद्यार्थीहरूलाई उच्चशिक्षा प्रदान गरिरहेको छ ।
सम्मेलन गर्नका लागि अलग अलग उपसमिति बनाएर अहिले युद्दस्तरमा तयारी भइरहेको क्याम्पस सञ्चालक समितिका अध्यक्ष विकास केसीले बताए । अध्यक्ष केसीकै अगुवाईमा असारमा भारतका दुईवटा प्रतिष्ठित विश्वविद्यालयसँग पाँच वर्षे शैक्षिक, अनुसन्धान र साँस्कृतिक आदानप्रदानलाई प्रोत्साहन गर्न सम्झौता भएको थियो । त्यही सम्झौताको जगमा यो सम्मेलन गर्न लागिएको पनि केसीले बताए । जनता क्याम्पसले पहिलोपल्ट असारमा भारतको हरियाणमा रहेको बाबा मस्तनाथ र राजस्थानमा रहेको श्री जे जे टि विश्वविद्यालयसँग सम्झौता गरेको थियो ।
विश्वविद्यालय अनुदान आयोग नेपालबाट गुणस्तर सुनिश्चितता प्रत्यायानको प्रमाणपत्र प्राप्त गर्न सफल जनता क्याम्पसमा स्नातक तहमा बिएड, बिबिएस, बिए, बिआइसिटिई तथा स्नातकोत्तरतर्फ एमएडसँगै एमबिएसका शैक्षिक कार्यक्रम सञ्चालन गरेको छ । कक्षा ११ र १२ का शैक्षिक कार्यक्रम पनि सञ्चालन गरेको छ ।