सुनसरी । आउँदो फागुन २१ गते मधेस प्रदेशमा प्रतिनिधि सभा सदस्यको निर्वाचन शान्तिपूर्ण, निष्पक्ष र सुरक्षित रूपमा सम्पन्न गराउन प्रदेशभरि व्यापक सुरक्षा व्यवस्था मिलाइएको छ। प्रदेश प्रहरी कार्यालयका अनुसार तीन तहको सुरक्षा परिचालनका साथै अति संवेदनशील मतदानस्थलमा ड्रोन र सीसी क्यामेरामार्फत निगरानीको व्यवस्था गरिएको छ।
मधेसका आठ जिल्लामा कुल २,१६० मतदानस्थल र ४,४७१ मतदान केन्द्र रहेका छन्। प्रदेश प्रहरीले तीमध्ये ५७ प्रतिशत मतदान केन्द्रलाई ‘अति संवेदनशील’ सूचीमा राखेको छ। वर्गीकरणअनुसार १,२३७ मतदानस्थल र २,६१३ मतदान केन्द्र अति संवेदनशील, ७६३ मतदानस्थल र १,५५४ मतदान केन्द्र संवेदनशील, तथा १६० मतदानस्थल र ३०४ मतदान केन्द्र सामान्य श्रेणीमा छन्।
सप्तरी जिल्लामा सबैभन्दा बढी ‘रेड जोन’ मतदानस्थल छन्। २९६ मतदानस्थलमध्ये २०९ अति संवेदनशील रहेका सप्तरी, सिरहा (१५४), धनुषा (१९४), महोत्तरी (१६३), सर्लाही (१५८), रौतहट (१५२) र बारामा (१५४) मतदानस्थल अति संवेदनशील सूचीमा परेका छन्। संवेदनशील मतदानस्थलमा विशेष सुरक्षा रणनीति लागू गरिएको छ।
प्रदेश प्रहरी प्रमुख डीआईजी गोविन्द थपलियाका अनुसार, मतदानस्थलको वर्गीकरण गर्दा मतदाताको चाप, सामाजिक–सांस्कृतिक परिवेश, विगतका घटना, भौगोलिक अवस्था र राजनीतिक गतिविधि लगायतका पक्षहरूलाई ध्यानमा राखिएको हो। खुला सीमा र विगतका घटनाले मधेस प्रदेशमा निर्वाचन व्यवस्थापनलाई चुनौतीपूर्ण बनाएको उनी बताउँछन्।
करीब ४६४ किलोमिटर लामो खुला सीमाका कारण अवैध प्रवेश, दोहोरो मतदाता र अन्य अवाञ्छित गतिविधि हुने सम्भावना रहेकोले संवेदनशील मतदानस्थलमा सुरक्षा सक्रियता थप सुदृढ गरिएको छ।
प्रदेशभरि करिब १२,६०० नेपाल प्रहरी र २८,२९५ निर्वाचन प्रहरी परिचालन हुनेछन्। सशस्त्र प्रहरी बल र नेपाली सेनाले समेत सक्रिय सहभागिता जनाउने भएकाले सुरक्षा व्यवस्थालाई अझ मजबुत बनाइएको डीआईजी थपलियाले जानकारी दिएका छन्।
सशस्त्र प्रहरी बल नेपाल नं. २ छिन्नमस्ता वाहिनीका डीआईजी कृष्ण ढकालका अनुसार, आठै जिल्लामा ४,३३६ सशस्त्र प्रहरी र २,८३२ निर्वाचन प्रहरी तयारी अवस्थामा छन्। उनीहरूले मुख्य निर्वाचन कार्यालय, जिल्ला निर्वाचन कार्यालय, मोबाइल टोली र रिजर्भ फोर्समार्फत सुरक्षा परिचालन गरिने बताएका छन्।
धनुषा र महोत्तरी जिल्लामा भारतसँग जोडिएको करिब ३९ किलोमिटर खुला सीमाका कारण सुरक्षा चुनौती रहने भए पनि प्रमुख जिल्ला अधिकारीहरूले आन्तरिक सुरक्षा चुस्त रहेको दाबी गरेका छन्। सीमा सुरक्षा बैठकहरू समेत भइसकेका छन् र निर्वाचन सुरक्षा व्यवस्थापनलाई थप सशक्त बनाउने विश्वास व्यक्त गरिएको छ।
डीआईजी थपलियाका अनुसार, प्रदेशभरि नेपाल प्रहरी र निर्वाचन प्रहरीबाट करिब ४० हजार, सशस्त्र प्रहरी बलबाट १० हजार र थप नेपाली सेनासमेत परिचालन गरी ५० हजारभन्दा बढी संयुक्त सुरक्षा फौज खटाइने तयारी छ।
Discussion about this post