दुहबी । जेन–जी आन्दोलनका क्रममा भदौ २३–२४ मा क्षतिग्रस्त बनेका स्थानीय तहहरूलाई पुनःसक्रिय बनाउने प्रयास अन्तर्गत कोशी प्रदेश सरकारले दुहबी नगरपालिकालाई करिब १८ लाख रुपैयाँ बराबरका सूचना–प्रविधि तथा कार्यालय सामग्री हस्तान्तरण गरेको छ। आन्दोलनका कारण अवरुद्ध भएको नेपालकै एक महत्वपूर्ण नगरपालिका सेवाको पुनःजागरण दुहबीदेखि नै सुरु भएको हो।
मुख्यमन्त्री हिक्मत कुमार कार्कीले बिहीबार एक कार्यक्रमका बीच नगरप्रमुख बेद नारायण गच्छदारलाई ल्यापटप, कम्प्युटर, दराज, प्रिन्टर, बायोमेट्रिक हाजिरी उपकरणलगायत ११ प्रकारका सामग्री प्रदान गर्दै पहिलो चरणको पुनःस्थापना अभियानको शुभारम्भ गरे।
जेन–जी आन्दोलनपछि कोशीमा १३७ मध्ये ३७ स्थानीय तहको सेवा आंशिक वा पूर्ण रूपमा थुनिएको प्रतिवेदन पाएपछि प्रदेश सरकारले क्षति मूल्यांकन गरी ३० पालिकामा ६ करोड १८ लाख बराबरका सामग्री उपलब्ध गराउने योजना अघि बढाएको छ। तीमध्ये १५४ वडामा सेवा चुस्त बनाउन आवश्यक उपकरण छिटोछिटो पुर्याइने प्रदेश सरकारको भनाइ छ।
मुख्यमन्त्री कार्कीले आन्दोलनले भत्काएको संरचना मात्र होइन, जनताको विश्वास पुनर्स्थापना गर्नु नै सरकारको पहिलो प्राथमिकता भएको बताए।
उनले भने “जेन–जी आन्दोलनको क्षतिले प्रशासनिक ढाँचा हल्लाएको छ। अब सेवा वडासम्म पु¥याएर जनताको दैनन्दिन समस्या समाधान गर्नु हाम्रो दायित्व हो।”
यस पटक उपलब्ध गराइएका सामग्रीहरू स्वीस सरकारको विकास साझेदारी सहयोग अन्तर्गत समन्वय गरी जुटाइएको मुख्यमन्त्री कार्यालयले जनाएको छ। कार्कीका अनुसार १० दिनभित्र सबै पालिकामा वितरण सकिनेछ।
सामग्री प्राप्त गर्दै नगरप्रमुख गच्छदारले आन्दोलनपछि दुहबीमा प्रशासनिक कामकारबाही पूर्णरूपमा अवरुद्ध भएको उल्लेख गर्दै भने
“हाम्रा संरचनामा मात्रै करिब ४ करोड ६५ लाख बराबरको क्षति भएको छ। आजको सहयोगले पुनर्निर्माणलाई हौसला मिलेको छ।”
कम्प्युटर, ल्यापटप, नेटवर्किङ स्विच, टेबल–कुर्सी, दराज, प्रिन्टर, यूपीएसदेखि औषधि सामग्री र प्लास्टिक कुर्सीसम्म प्रदान गरिएको छ, जसले स्वास्थ्य, प्रशासनिक र नागरिक सेवा पुनः सञ्चालनमा प्रत्यक्ष मद्दत पुग्ने अपेक्षा गरिएको छ।
जेन–जी आन्दोलनपछि स्थानीय तहहरूमा रोकिएको सेवाको ‘रिस्टार्ट’ दुहबीबाट भएको भन्दै प्रदेश सरकारले यसलाई “कोशी पुनर्निर्माण अभियानको टर्निङ–पोइन्ट” का रूपमा लिएको छ।
Discussion about this post