नेकपा एमाले द्वारा प्रदेश सरकारको खोजी सुरु

विराटनगर । प्रमुख प्रतिपक्षी दल नेकपा एमालेले प्रदेश सरकारको खोजी सुरु गरेको जनाएको छ । नेकपा एमाले प्रदेश–१ को संसदीय दलले विराटनगरमा पत्रकार सम्मेलन गरेर प्रदेश सरकार खोज्न थालेको जानकारी दिएको हो । नेकपा एमाले प्रदेश १ का संसदीय दलका नेता तथा पूर्व मुख्यमन्त्री भीम आचार्यले प्रदेश १ मा सरकार भएको अनुभूति हुन नसकेकाले प्रतिपक्ष एमालेले सरकारको खोजी थालेको बताए । ५ दलीय गठबन्धनको सरकार गठन भएको तीन महिना बितिसक्दासमेत मन्त्रालय र मन्त्री भागबण्डाको झगडामै अल्झिरहेको उनको आरोप छ । जनताका समस्यालाई ध्यान नदिइ कुम्भकर्ण जसरी प्रदेश सरकार सुतेको आचार्यको टिप्पणी छ । उनले नयाँ र राम्रा काम गर्नुको साटो अघिल्लो सरकारले तयार गरेका विकास र समृद्धिका आधारहरूलाई भत्काउने, विगार्ने, समितिहरू विघटन गर्ने र बजेटविहीन बनाएर निष्प्रभावी बनाउने काममा सरकार लागिरहेको बताए । जनताको समस्याका बारेमा छलफल गर्ने संसदलाई विजनेशविहीन बनाएर सरकार मन्त्रालय फुटाएर विकासका आयोजना कटौती गरी मन्त्रीहरूको भरणपोषण गर्ने काममा लागेको आचार्यको आरोप छ । भागबण्डा मिलाउन मन्त्रालय फुटाएर १२ पुर्याइएको विषयमा विपक्षी एमालेले सशक्त बिरोध गर्ने आचार्यले स्पष्ट पारे ।