इनरुवा । सुनसरीकाे दुहबी वडा नम्बर ६ मा सञ्चालनमा रहेका दुई वटा छाला उद्योग, एसियन लेदर र युनाइटेड टनेरिजको अनुगमन र निरीक्षण सम्पन्न भएको छ। स्थानीय बासिन्दाहरूको लगातारको गुनासो तथा उजुरीका आधारमा, दुहबी प्रहरीको रोहबरमा स्थानीय सञ्चारकर्मी, प्रहरी अधिकारीहरू, र बासिन्दाहरूको टोलीले अनुगमन गरेको हो। ती उद्योगहरूले प्रचलित मापदण्डको उल्लङ्घन गर्दै बस्तीमा दुर्गन्ध फैलाएको र वातावरणीय प्रदूषण गरिरहेको आरोप लागेको छ।
अनुगमनका लागि आधिकारिक पत्र लिएर टोली उद्योग परिसरमा पुगे पनि, उद्योग प्रशासनले अनुगमन रोक्ने प्रयास गरेको थियो। उद्योगको गेटमा टोलीलाई रोकेर अवरोध सिर्जना गरेपछि नेपाल प्रहरीले हस्तक्षेप गर्दै अनुगमन प्रक्रिया अघि बढाउन सहजीकरण गरेको थियो।
अनुगमनका क्रममा युनाइटेड टनेरिजले उद्योग सम्बन्धी कागजात देखाए पनि, एसियन लेदरले भने कागजात घरमा रहेको भन्दै उपलब्ध गराउन असफल रह्यो। अनुगमन टोलीले उद्योगको सञ्चालन अवस्थाबारे थप जानकारी संकलन गरेको छ।
युनाइटेड टनेरिजलाई जिल्ला प्रशासन कार्यालयले असोज ६ गते नै उद्योग बन्द गर्न निर्देशन दिएको थियो, तर अनुगमनका क्रममा उद्योग अझै भित्रभित्रै सञ्चालन भइरहेको पाइएको छ। त्यस्तै, फोहोर पानी बुढी खोलामा मिसाइएको पुष्टि भएको छ, जसले नदी प्रदूषणको खतरा निम्त्याएको छ।
प्रचलित कानुन अनुसार, यस्ता उद्योगहरू बस्तीबाट ५ किलोमिटर टाढा हुनुपर्ने भए पनि, दुवै उद्योग बस्तीको नजिकै अवस्थित छन्, जसले स्थानीय बासिन्दाको स्वास्थ्यमा नकारात्मक प्रभाव पारेको छ। स्थानीय बासिन्दाहरूले उद्योगका कारण फैलिएको दुर्गन्ध र वातावरणीय प्रदूषणले जनजीवन अस्तव्यस्त बनाएको गुनासो गरेका छन्।
यस विषयमा प्रतिनिधि सभा सदस्य भगवती चौधरीले भनिन्, “प्रचलित कानुन अनुसार उद्योगहरूलाई बस्तीबाट टाढा राख्नुपर्छ। यी उद्योगहरूले वातावरणीय मापदण्ड पालना नगरेर जनस्वास्थ्यमा गम्भीर प्रभाव पारेका छन्। यसलाई तत्काल नियन्त्रण गर्न छाला उद्योगहरूलाई स्थानान्तरण गर्नुपर्ने देखिन्छ। साथै, कानुनी कारवाहीका लागि पनि प्रक्रिया अघि बढाइएको छ।”
अनुगमन टोलीले उद्योग प्रशासनलाई मापदण्ड पालना गर्न, प्रदूषण नियन्त्रणका लागि तत्काल कदम चाल्न, र उद्योग स्थानान्तरणको प्रक्रिया अघि बढाउन निर्देशन दिएको छ। स्थानीयबासीले भने उद्योगहरूको अव्यवस्थित फोहोर व्यवस्थापन र दुर्गन्धको समस्यासम्बन्धी निरन्तर गुनासो गरिरहेका छन्।
Discussion about this post