देवानगञ्जको भगत पेट्रोल पम्पमा ठगी काण्ड: ५ लिटर डिजेल कम दिएको आरोप, पम्प सिलबन्द

देवानगञ्ज – सुनसरी जिल्लाको देवानगञ्ज गाउँपालिका वडा नं. २ स्थित भगत पेट्रोल पम्पमा ग्राहक ठगिएको घटना सार्वजनिक भएपछि स्थानीय किसानहरू आक्रोशित भएका छन्। किसानहरूले पम्पले ५ हजार रुपैयाँको डिजेल किन्दा ५ लिटर डिजेल कम दिएको गुनासो गरेका छन्।

स्थानीय किसान संजित मेहताले लामो समयदेखि खेतमा व्यस्त रहँदा छोराछोरीलाई तेल पम्पबाट डिजेल ल्याउन पठाउने गरेको बताए। तर, पटक–पटक डिजेलको मात्रा कम देखिएपछि उनी आफैं पम्पमा पुगे। “पम्पमा डिजेल भर्दा पनि ५ लिटर कम थियो। गुनासो गर्दा पम्पका कर्मचारीहरूले बदमासीपूर्ण व्यवहार गरे,” मेहताले भने।

गुनासोका क्रममा कर्मचारीहरूले गुण्डागर्दी शैलीमा धम्की दिने प्रयास गरेको पनि उनले आरोप लगाए। विवाद बढेपछि पम्पका प्रमुख दिपनारायण भगतले दोब्बर डिजेल दिएर कुरा मिलाउन खोजे।

यता घटनाको जानकारी पाएपछि नेपाल आयल निगमले पम्पमा प्राविधिक जाँच गरेको छ। प्राविधिकहरूले पम्पमा डिजेल नापतौल गर्ने उपकरणमा समस्या देखिएको पुष्टि गर्दै पम्पलाई पूर्ण रूपमा सिलबन्द गरेका छन्।

नेपाल आयल निगमका एक अधिकारीका अनुसार पम्पहरूको नियमित चेकजाँच हुने भए पनि प्राविधिक त्रुटिका कारण यसपटक समस्या देखा परेको हो। “नियमित चेकजाँचमा पनि कहिलेकाहीँ यस्तो समस्या आउन सक्छ। यसलाई सुधार गर्नका लागि पम्पलाई सिल गरिएको छ,” अधिकारीले भने।

त्यसैगरी पम्पका सञ्चालक दिपनारायण भगतले मापनका उपकरण बिग्रिएको स्वीकार्दै समयमै आयल निगमलाई जानकारी गराएको दाबी गरेका छन्। उनले भने, “मेसिनरी उपकरण कहिलेकाहीँ बिग्रन सक्छ। समस्या समाधान नगरेसम्म पम्प सञ्चालन गरिने छैन।”

ग्राहक ठगीका घटनाले स्थानीय किसानहरूमा असन्तोष बढेको छ। ठगीमाथि कडा कानुनी कारबाही गर्न माग गर्दै उनीहरूले पम्पका सञ्चालक र कर्मचारीहरूको गैरजिम्मेवारीपूर्ण व्यवहारप्रति आपत्ति जनाएका छन्।

“हाम्रो दैनिक जीवनमा डिजेलको ठूलो भूमिका हुन्छ। यस्तो ठगीले किसानहरूलाई ठूलो घाटा पुर्‍याउँछ,” एक स्थानीय किसानले भने।

यता नेपाल आयल निगमले यस्ता घटनाहरू रोक्न थप निगरानी र कडा कदम चाल्ने प्रतिबद्धता जनाएको छ। “ग्राहकहरूको विश्वास कायम गर्न हामी निरीक्षण प्रक्रिया अझ प्रभावकारी बनाउनेछौं,” निगमका प्रतिनिधिले बताए।

त्यसैगरी देवानगञ्जको भगत पेट्रोल पम्पमा देखिएको ग्राहक ठगी प्रकरणले स्थानीय किसानहरूलाई अन्योलमा पारेको छ। यो घटना उपभोक्ता सुरक्षाप्रति जिम्मेवार निकायहरूले चनाखो भई काम गर्नुपर्ने आवश्यकता स्पष्ट पार्छ। यस्ता ठगी रोक्न कडा निगरानी र कानुनी कारबाही मात्र होइन, नियमित निरीक्षणलाई थप व्यवस्थित बनाउन जरुरी देखिएको छ।