झुम्का बजार व्यवस्थापनमा सुधारको पहल, सरोकारवालाको गुनासोपछि समिति गठन

सुनसरी। रामधुनी नगरपालिकाको प्रमुख व्यापारिक केन्द्रका रूपमा परिचित झुम्का बजार अझै अव्यवस्थित रहँदा स्थानीय व्यापारी र सरोकारवालाहरूले असन्तुष्टि जनाएका छन्। नगरपालिकाले सोमबार आयोजना गरेको विशेष छलफल कार्यक्रममा सहभागीहरूले बजारको दीर्घकालीन समस्या समाधानमा नगरपालिकाको बेवास्ता भएको आरोप लगाउँदै तत्काल सुधारको माग गरेका छन्।
सहभागीहरूका अनुसार बजार क्षेत्रमा ट्राफिक अव्यवस्था, सडकमा हिलो–धुलो, बन्द नाला, फुटपाथ पसलको अतिक्रमण, र अव्यवस्थित पार्किङका कारण दैनिक व्यापारी र उपभोक्ता दुबै प्रभावित छन्। विशेषगरी साप्ताहिक हाटबजार, बसपार्क, सिटी सफारी पार्किङ, र फलफूल बजार क्षेत्रमा अव्यवस्था स्थायी समस्या बनेको बताइन्छ। कृषि प्रयोजनका लागि निर्माण गरिएका टहराहरू प्रयोगविहीन रहँदा अनधिकृत रूपमा भाडामा लगाइएको आरोप पनि छलफलमा उठाइएको थियो।
छलफलमा नगर प्रमुख शंकरलाल चौधरीले बजार व्यवस्थापन सुधारका लागि तत्काल सूचना जारी गरी कार्यान्वयन अघि बढाउने प्रतिबद्धता जनाए। उप–मेयर तारा थापाले सरोकारवालाबाट प्राप्त सुझावलाई प्राथमिकतामा राखिने बताइन्। प्रमुख प्रशासकीय अधिकृत तेजनारायण यादवले प्राथमिक समस्या छोटो अवधिमै समाधान गर्ने र दीर्घकालीन सुधारका लागि आगामी बजेटमा व्यवस्था गर्ने योजना सार्वजनिक गरे।

बजार व्यवस्थापनका लागि ५ नं. वडाध्यक्ष भोला वास्तोलाको संयोजकत्वमा ११ सदस्यीय समिति गठन गरिएको छ। समितिले बजारको समस्या पहिचान गरी सुधारका लागि ठोस कार्ययोजना तयार गर्ने जिम्मेवारी पाएको छ।
यसैबीच, रामधुनी नगरपालिकाले बजार क्षेत्रमा फुटपाथ अतिक्रमण, सडक अवरोध, र अवैध पार्किङ नगर्न चेतावनीसहित सार्वजनिक सूचना जारी गरेको छ। नगरले उल्लंघन गर्नेहरूमाथि कारबाही हुने बताएको छ। सहभागीहरूले भने, विगतमा पनि यस्ता सूचना जारी भए पनि प्रभावकारी अनुगमन र निरन्तरता नहुँदा समस्या यथावत् रहेको जनाएका छन्।
स्थानीय व्यापारीहरूको भनाइमा, नियमित अनुगमन, स्पष्ट कार्ययोजना र दिगो व्यवस्थापन भए झुम्का बजार प्रदेशकै आकर्षक र व्यवस्थित व्यापारिक केन्द्रका रूपमा विकसित हुन सक्छ।