ओखलढुंगा । ओखलढुंगाको चिशङ्खुगढी गाउँ फेरि एकपटक रगतले रङ्गिएको छ। एक महिना नबित्दै उस्तै प्रकृतिको अर्को जघन्य अपराध घटेपछि भदौरे क्षेत्र भय र असुरक्षाको चपेटामा परेको छ।
चिशङ्खुगढी–६ को बोहोरे टोलमा बस्दै आएका अन्दाजी ८१ वर्षीय चन्द्रविक्रम राई र उनकी ८० वर्षीया पत्नी चन्द्रमाया राईको सोमबार राति हत्या भएको अवस्थामा शव फेला परेको हो। स्थानीयका अनुसार उनीहरू लामो समयदेखि सानो पसल सञ्चालन गर्दै आएका थिए र लुटपाटकै उद्देश्यले हत्या गरिएको आशंका गरिएको छ।
प्रहरीका अनुसार, घरको दोस्रो तलास्थित सुत्ने कोठामा श्रीमान् खाटमै सिरक ओढिएको अवस्थामा मृत फेला परे भने श्रीमतीको शव खाटको छेउ भुइँमा, सिरकले छोपिएको अवस्थामा भेटिएको थियो। मंगलबार बिहान करिब ७ः४० बजे घटनाको सूचना प्रहरी चौकी निशङ्खेमा पुगेको थियो।
सूचना पाउनासाथ प्रहरी टोली घटनास्थल पुगेको र सुरक्षा व्यवस्था कडा बनाइएको जिल्ला प्रहरी कार्यालयले जनाएको छ। प्रहरी नायब उपरीक्षक मदन केसीका अनुसार घटनास्थल सुरक्षित राखी थप अनुसन्धानका लागि प्रहरी परिचालन गरिएको छ।
यो घटना एक्लो भने होइन। यसअघि गत पुस १५ गते सोही वडाको गैरीगाउँमा मगर दम्पतीको लुटपाटपछि हत्या भएको थियो। त्यसभन्दा केही महिना अघि, असोज २६ गते सिद्धिचरण नगरपालिका–४ चार्खुमा एकल महिला रत्नकुमारी कटवाल (कार्की) पनि हत्या भएकी थिइन्।
यी घटनामा संलग्न भएको आरोपमा मिलन भनिने सङ्गम राई, विनोद राई, प्रकाश भुजेल र दोर्जे भनिने अशोक भुजेल गरी चार जना युवालाई प्रहरीले पक्राउ गरी अनुसन्धान अघि बढाइरहेको छ।
लगातार उस्तै ढाँचामा भएका हत्याले गाउँ नै त्रसित बनेको छ। वृद्ध दम्पतीलाई निशाना बनाइएका यस्ता घटनाले शृङ्खलाबद्ध अपराधको आशंका बढाएको स्थानीयको भनाइ छ। नागरिक सुरक्षामाथि गम्भीर प्रश्न उठेको भन्दै दोषीलाई तत्काल पहिचान गरी कडा कारबाही गर्न स्थानीयवासीले प्रहरीसमक्ष जोडदार माग गरेका छन्।
Discussion about this post