चिराैली । सुनसरीको भोक्राहा नरसिंह गाउँपालिकाले पवित्र रमजान महिनाको अवसरमा देश तथा विदेशमा रहेका सम्पूर्ण मुस्लिम समुदायलाई हार्दिक शुभकामना व्यक्त गरेको छ।
गाउँपालिकाका अध्यक्ष अजमल अख्तर आजादले जारी गरेको शुभकामना सन्देशमा रमजानले त्याग, संयम, आत्मशुद्धि र मानवसेवाको भावना विकास गर्न प्रेरणा दिने उल्लेख गर्नुभएको छ। उहाँले रमजानको रोजा, नमाज र दान–धर्मबाट प्राप्त आध्यात्मिक शक्तिले समाजमा सकारात्मक ऊर्जा फैलाउने विश्वास व्यक्त गर्नुभयो।
अध्यक्ष आजादले शुभकामना सन्देशमा भन्नुभएको छ, “रमजानको पवित्र महिनाले हामी सबैमा आपसी सद्भाव, सहिष्णुता र भाइचाराको भावना अझ सुदृढ बनाओस्। यसले समाजमा शान्ति, एकता र समृद्धि कायम गर्न प्रेरणा प्रदान गरोस् भन्ने मेरो कामना छ।”
उहाँले धार्मिक सहिष्णुता र आपसी सम्मान नै राष्ट्रिय एकताको आधार भएको उल्लेख गर्दै सबै समुदाय मिलेर समृद्ध नेपाल र सुखी नेपालीको साझा लक्ष्यतर्फ अघि बढ्नुपर्ने धारणा व्यक्त गर्नुभयो। रमजानजस्ता पावन पर्वले सामाजिक एकता बलियो बनाउने उहाँको भनाइ छ।
अध्यक्ष आजादले अन्त्यमा रमजानको अवसरमा सबैको सुख, शान्ति, स्वास्थ्य र प्रगतिको कामना गर्दै पुनः हार्दिक शुभकामना व्यक्त गर्नुभएको छ।
Discussion about this post