सुनसरी। सुनसरीका विभिन्न बजार क्षेत्रमा एलपी ग्यासको कृत्रिम अभाव देखिएको भन्दै उपभोक्ताले कालोबजारी भइरहेको गुनासो गरेका छन्। बजारमा ग्यास अभाव भएको बताइए पनि केही स्थानमा बढी मूल्य लिएर सिलिन्डर बिक्री भइरहेको उपभोक्ताहरूको आरोप छ।
इनरुवा, दुहबी, इटहरी र धरान आसपासका बजारमा ग्यास सहज रूपमा नपाइने अवस्था बनेको स्थानीयले बताएका छन्। पसलमा ग्यास छैन भनिए पनि अतिरिक्त रकम तिर्ने ग्राहकलाई भने उपलब्ध गराइने गरिएको उपभोक्ताको भनाइ छ।
इनरुवाकी एक स्थानीय उपभोक्ता माया देवी साह भन्छिन्, “दुई–तीन दिनदेखि ग्यास खोज्दै हिँडिरहेका छौँ, तर पसलमा छैन भन्छन्। तर केहीले बढी पैसा दिएपछि पाइन्छ भन्ने सुनेका छौँ।”
यस्तै, दुहबीका उपभोक्ता रमेश यादवका अनुसार अहिले विवाह तथा अन्य सामाजिक कार्यक्रमको सिजन भएकाले ग्यासको माग बढी छ। “बिहे–बटुलोको समयमा ग्यास झन् आवश्यक हुन्छ। यही मौका पारेर केही व्यापारीले महँगोमा बेचिरहेका छन् भन्ने कुरा बजारमा सुनिन्छ,” उनले भने।
स्थानीयका अनुसार केही पसलमा गोदाममा ग्यास राखेर बाहिर अभाव देखाइने र पछि बढी मूल्यमा बिक्री गरिने गरिएको आशंका गरिएको छ।
उपभोक्ताले बजार अनुगमन गरी कालोबजारी रोक्न प्रशासनसँग माग गरेका छन्। तर हालसम्म सम्बन्धित निकायबाट प्रभावकारी अनुगमन वा कारबाही नभएको भन्दै स्थानीयले असन्तुष्टि जनाएका छन्।
उपभोक्ताहरूले विवाह तथा अन्य सामाजिक कार्यक्रमका बेला ग्यासको अभाव हुनु गम्भीर विषय भएको भन्दै तत्काल बजार अनुगमन गरी कालोबजारी नियन्त्रण गर्न प्रशासनसँग माग गरेका छन्।
Discussion about this post