दुहबी। सुनसरीको दुहबी नगरपालिकामा स्वास्थ्य सेवा प्रभावकारी बनाउने उद्देश्यले विभिन्न सरोकारवालाबीच अन्तरक्रिया कार्यक्रम सम्पन्न भएको छ। कार्यक्रममा नगर प्रमुख बेद नारायण गच्छदार, प्रमुख प्रशासकीय अधिकृत सुवर्ण घिमिरे, प्रदेश स्वास्थ्य मन्त्रालय कोशीका विज्ञ चिकित्सकहरू, कूटनीतिक नियोगसँग आबद्ध स्वास्थ्य विशेषज्ञ तथा सरोकारवाला संस्थाका प्रतिनिधिहरूको सहभागिता रहेको थियो।
कार्यक्रममा बेलायती दूतावास काठमाडौँसँग सम्बन्धित स्वास्थ्य विज्ञहरू, अन्तर्राष्ट्रिय तथा राष्ट्रिय स्तरका चिकित्सकहरू तथा करुणा फाउन्डेसनका प्रतिनिधिहरू सहभागी भएका थिए। सहभागीहरूले स्थानीय तहमा स्वास्थ्य सेवा सुधार, गुणस्तरीय उपचार प्रणाली विस्तार र जनस्वास्थ्यका चुनौतीबारे खुला छलफल गरेका थिए।
अन्तरक्रियाका क्रममा स्वास्थ्य सेवामा सहज पहुँच विस्तार, दक्ष जनशक्ति व्यवस्थापन, आधारभूत स्वास्थ्य पूर्वाधार सुदृढीकरण तथा सेवा प्रवाहलाई चुस्त बनाउने विषयमा विशेष जोड दिइएको थियो।
नगर प्रमुख बेद नारायण गच्छदारले स्थानीय सरकारले स्वास्थ्य क्षेत्रलाई प्राथमिकतामा राखेको उल्लेख गर्दै भने, “जनताले गुणस्तरीय र सहज स्वास्थ्य सेवा पाउनुपर्ने हाम्रो पहिलो दायित्व हो। यसका लागि संघ, प्रदेश र स्थानीय तहबीच समन्वय अपरिहार्य छ।”
प्रमुख प्रशासकीय अधिकृत सुवर्ण घिमिरेले सेवा प्रवाहमा देखिएका चुनौती समाधानका लागि नीतिगत सुधारसँगै कार्यान्वयन पक्ष बलियो बनाउनुपर्नेमा जोड दिए। “नीति राम्रो भए पनि कार्यान्वयन प्रभावकारी नभएसम्म अपेक्षित परिणाम आउँदैन, त्यसैले व्यवस्थापनमा सुधार आवश्यक छ,” उनले भने।
प्रदेश स्वास्थ्य मन्त्रालयका एक विज्ञ चिकित्सकले स्थानीय तहमा जनशक्ति अभाव र स्रोत व्यवस्थापन मुख्य चुनौती रहेको उल्लेख गर्दै दक्ष जनशक्ति उत्पादन र परिचालनमा लगानी बढाउनुपर्ने बताए।
करुणा फाउन्डेसनका प्रतिनिधिले समुदायमा आधारित स्वास्थ्य कार्यक्रम प्रभावकारी रहेको अनुभव सुनाउँदै स्थानीय तहसँग सहकार्य गरेर मातृ तथा शिशु स्वास्थ्य सुधारमा थप काम गर्न सकिने बताए।
कार्यक्रमको निष्कर्षमा स्वास्थ्य क्षेत्रको दिगो सुधारका लागि नीति, योजना र कार्यान्वयनबीच प्रभावकारी समन्वय आवश्यक रहेको औंल्याइएको छ। साथै सरोकारवाला निकायबीच निरन्तर सहकार्य र अनुगमनलाई सुदृढ बनाउने सहमति समेत गरिएको छ।
Discussion about this post