काठमाडौँ । पूर्वप्रधानमन्त्री केपी शर्मा ओलीलाई प्रहरीले पक्राउ गरेको दाबी सार्वजनिक भएपछि राजनीतिक वृत्तमा तरंग पैदा भएको छ। शनिबार बिहान भक्तपुरको गुण्डुबाट उनलाई नियन्त्रणमा लिएको भनिए पनि यसबारे नेपाल प्रहरीले औपचारिक रूपमा पुष्टि गरेको छैन।
प्राप्त विवरणअनुसार ओलीलाई नियन्त्रणमा लिएर जरुरी पक्राउ पुर्जीसमेत थमाइएको उल्लेख गरिएको छ। यद्यपि, पक्राउको आधार, मुद्दाको प्रकृति र कानुनी प्रक्रिया सम्बन्धी विवरण सार्वजनिक भइसकेको छैन।
यसअघि शुक्रबार गठन भएको नयाँ सरकारले पहिलो मन्त्रिपरिषद् बैठकमार्फत गौरीबहादुर कार्की नेतृत्वको जाँचबुझ आयोगको प्रतिवेदन कार्यान्वयन गर्ने निर्णय गरेको बताइएको छ। सो आयोगले जेनजी प्रदर्शनका क्रममा भएका घटनाबारे छानबिन गरी पूर्वप्रधानमन्त्री ओलीसहित तत्कालीन गृहमन्त्री रमेश लेखकविरुद्ध अनुसन्धान अघि बढाउन सिफारिस गरेको दाबी गरिएको छ।
आयोगको प्रतिवेदनमा भदौ २३ र २४ गते भएको प्रदर्शनका क्रममा काठमाडौंको बानेश्वर क्षेत्रमा किशोरहरूमाथि गोली प्रहार भएको घटनामा जिम्मेवारी उच्च तहसम्म पुगेको उल्लेख गरिएको भनिएको छ।
जेनजी प्रदर्शनका क्रममा ७६ जनाको मृत्यु भएको विवरणसमेत सार्वजनिक भए पनि यससम्बन्धी आधिकारिक तथ्यांक र सरकारी पुष्टि भने आउन बाँकी छ।
Discussion about this post