सुनसरी : वर्तमान प्रधानमन्त्री बालेन शाहको पुर्ख्यौली गाउँका रूपमा चिनिने महोत्तरीको एकडारा गाउँपालिकाका जनप्रतिनिधि तथा कर्मचारीहरूको टोलीलाई भोक्राहा नरसिंह गाउँपालिकाले भव्य स्वागत गरेको छ।
भोक्राहा नरसिंह गाउँपालिका अध्यक्ष अजमल अख्तर आजादको नेतृत्वमा गाउँपालिकाले एकडारा गाउँपालिकाबाट आएको टोलीलाई सम्मानसहित स्वागत गर्दै स्थानीय तहबीच आपसी सम्बन्ध विस्तार, अनुभव आदान–प्रदान तथा सहकार्यलाई थप मजबुत बनाउने उद्देश्यले कार्यक्रम आयोजना गरिएको जनाएको छ।
स्वागत कार्यक्रममा अध्यक्ष आजादले स्थानीय तहहरूबीचको सहकार्यले विकास निर्माण, सेवा प्रवाह, सुशासन तथा जनमुखी कार्यक्रम सञ्चालनमा सकारात्मक प्रभाव पर्ने उल्लेख गर्दै एकडारा गाउँपालिका कार्यालय महाेत्तरीसँग दीर्घकालीन साझेदारीका सम्भावनाहरू रहेको बताए।
एकडारा गाउँपालिकाका प्रतिनिधिहरूले भोक्राहा नरसिंह गाउँपालिकाले गरेको आत्मीय स्वागतप्रति धन्यवाद व्यक्त गर्दै दुवै पालिकाबीच अनुभव साटासाट र सहकार्यलाई निरन्तरता दिनुपर्ने धारणा राखेका थिए।
कार्यक्रममा दुवै पालिकाका जनप्रतिनिधि, कर्मचारी, सामाजिक अगुवा तथा स्थानीय व्यक्तिहरूको उपस्थिति रहेको थियो। कार्यक्रम सञ्चालन भने भोक्राहा नरसिंह गाउँपालिकाका स्वास्थ्य शाखा प्रमुख हिरालाल साहले गरेका थिए।
स्वागत कार्यक्रमपछि टोलीले भोक्राहा नरसिंह गाउँपालिकाको कार्यालय व्यवस्थापन, सेवा प्रवाह प्रणाली तथा केही विकास योजनाहरूको अवलोकनसमेत गरेको जनाइएको छ।
स्थानीय तहबीच यस प्रकारको भेटघाट र अनुभव आदान–प्रदानले विकासका नयाँ सम्भावना खोज्न तथा जनताको सेवा अझ प्रभावकारी बनाउन सहयोग पुग्ने विश्वास व्यक्त गरिएको छ।
Discussion about this post