इनरुवा । प्रतिनिधिसभा सदस्य निर्वाचनका लागि झापा–५ क्षेत्रबाट उम्मेदवारी दर्ता गराउने तयारीमा राष्ट्रिय स्वतन्त्र पार्टी (रास्वपा) का वरिष्ठ नेता बालेन्द्र (बालेन) शाह दमक पुगेका छन्। नेकपा एमालेका अध्यक्ष केपी शर्मा ओलीको गढ मानिएको यस क्षेत्रमा बालेनको प्रवेशले राजनीतिक माहोल तताएको छ।
मंगलबार बिहान जनकपुरको कार्यक्रममा सहभागी भएर झापा आएका बालेन शाहले बिहान ११ बजे निर्वाचन अधिकृतको कार्यालय पुगेर उम्मेदवारी दर्ता गर्ने कार्यक्रम तय गरेका छन्। उम्मेदवारी दर्ताका लागि बालेन आफ्ना समर्थक तथा पार्टीका कार्यकर्ताहरूको ठूलो जुलुससहित कार्यालयतर्फ निस्कने तयारीमा छन्। उनले सामाजिक सञ्जालमार्फत झापा आइपुगेको जानकारी दिएर चुनावी मैदानमा सक्रिय भएको संकेत गरेका छन्।
त्यस्तै, एमाले अध्यक्ष केपी शर्मा ओलीले पनि आज दिउँसो १ बजे सोही क्षेत्रबाट आफ्नो उम्मेदवारी दर्ता गर्ने कार्यक्रम बनाएका छन्। ओली सोमबार नै झापा पुगिसकेका छन्। दुवै प्रमुख उम्मेदवारले केही घण्टाको अन्तरालमा मनोनयन दर्ता गराउने भएपछि दमक चोक र आसपासका क्षेत्रमा सुरक्षा व्यवस्था कडा गरिएको छ। साथै, दुवै पक्षका कार्यकर्ताहरूको बाक्लो उपस्थितिले क्षेत्रको राजनीतिक उन्मादलाई थप बढाएको छ।
लामो समयदेखि केपी ओलीको गढ मानिएको झापा–५ मा बालेन शाहको इन्ट्रीले चुनावी प्रतिस्पर्धालाई देशकै सबैभन्दा रोचक भिडन्तको रूपमा हेरिएको छ। युवाहरूको आकर्षणका केन्द्र बन्दै आएका बालेन र अनुभवी नेता ओलीबीचको यो सिधा प्रतिस्पर्धाले झापा मात्र नभई देशभर नयाँ तरंग सिर्जना गरेको छ। अहिले दमक चोकमा रास्वपाका कार्यकर्ताहरू स्वस्फूर्त रूपमा बालेनको स्वागत र उम्मेदवारी दर्ताको र्यालीका लागि भेला भइरहेका छन्।
Discussion about this post