सुनसरी । झापा निर्वाचन क्षेत्र नम्बर ५ को नतिजाले यसपटक नेपाली राजनीतिमा ठुलै ‘कमेडी सीन’ थपिदिएको छ। राष्ट्रिय स्वतन्त्र पार्टी (रास्वपा) का वरिष्ठ नेता बालेन शाहले भारी मतान्तरसहित विजय हासिल गर्दै नेकपा एमालेका अध्यक्ष तथा पूर्वप्रधानमन्त्री केपी शर्मा ओलीलाई स्पष्ट रूपमा पराजित गरेका छन्।
अन्तिम मतपरिणाम अनुसार बालेन शाहले ६८ हजार ३४८ मत प्राप्त गरेका छन् भने ओलीले १८ हजार ७३४ मत मात्रै पाएका छन्। यससँगै दुवैबीचको मतान्तर ४९ हजार ६१४ पुगेको छ। चुनावी भाषामा भन्ने हो भने, यो मतान्तरले त झापा–५ को मतपेटिकालाई पनि अचम्ममा पारिदिएको जस्तो देखिन्छ।
स्थानीय मतदाताहरू मजाक गर्दै भन्छन्, “यसपटक त भोट गन्नेहरूलाई पनि काम सजिलो भयो, किनकि मतान्तर हेर्दा नतिजा बुझ्न क्यालकुलेटर पनि धेरै चलाउनु परेन।”
एमाले अध्यक्ष ओलीका लागि झापा–५ को यो हार झनै अर्थपूर्ण बनेको छ, किनकि उनी यसअघि पनि २०६४ सालको पहिलो संविधानसभा निर्वाचनमा पराजित भएका थिए। त्यतिबेला तत्कालीन नेकपा माओवादीका विश्वदीप लिङ्देनसँग हार व्यहोरेका ओलीले यसपटक भने बालेन शाहसँग प्रतिस्पर्धा गर्दै फेरि हारको स्वाद चाख्नुपरेको छ।
कुनै समय आफ्नो क्षेत्रमा “एमालेबाट जुत्ता उठाए पनि चुनाव जितिन्छ” भन्ने आत्मविश्वासपूर्ण अभिव्यक्ति दिने ओलीलाई यसपटक मतदाताले ‘जुत्ता होइन, सीधै मतपत्र’बाट जवाफ दिएको टिप्पणी सामाजिक सञ्जालमा सुनिन थालेको छ।
यता बालेन शाहको जितलाई समर्थकहरूले “झापामा नयाँ अध्याय”को रूपमा व्याख्या गरेका छन्। चुनावी मैदानमा आएको यो नतिजाले झापा–५ को राजनीतिक गणित मात्रै होइन, धेरै नेताहरूको चुनावी गणित पनि फेरि मिलाउनुपर्ने अवस्था सिर्जना गरेको विश्लेषकहरूको भनाइ छ।
Discussion about this post