जनता क्याम्पसमा झण्डै पाँच करोड खर्चेर छात्रावास निर्माण

इटहरी । इटहरीमा समुदायिक स्तरबाट सञ्चालित जनता बहुमुखी क्याम्पसमा अध्ययन गर्न आउने विद्यार्थीका लागि छात्र तथा छात्राका लागि अलग अलग छात्रावास निर्माण हुने भएको छ । छात्रावासको शनिबार सञ्चालक समिति अध्यक्ष विकास केसीले सिलान्यास गरे ।
झण्डै पाँच करोड खर्चेर छात्रावास निर्माण हुने भएको हो । संघीय सरकारले चालु आर्थिक वर्षको बजेटमा बहुवर्षीय योजना अन्तर्गत बजेट छुट्याएर पहिलो किस्तामा एक करोड ४२ लाख रुपैयाँ निकासा भएसँगै सिलान्यास गरेर काम सुरुवात गरिएको हो । क्याम्पसले विद्यार्थीहरुको शैक्षिक अभिवृद्दि गर्ने विभिन्न योजना ल्याउने क्रममा छात्रावास पनि एउटा महत्वपूर्ण पक्षको रुपमा लिएको अध्यक्ष केसीले बताए ।
छात्रावासका लागि बहुवर्षीय योजना अन्तर्गत अहिले पहिलो चरणमा छात्र र छात्राका लागि अलग अलग एक तले भवनमा १४(१४ वटा कोठा निर्माण हुनेछन् । निर्माणका लागि चारुमति कन्ट्रक्सन प्रालि वानेश्वर काठमाडौंले ठेक्का पाएर काम थालेको हो । ठेकेदार जीवन तिम्सिनाका अनुसार अहिले पहिलो चरणको काम २०८४ पुस मसान्तभित्र पुरा गर्ने सहमति भएको छ ।
बहुवर्षीय योजना अन्तर्गत बन्ने छात्राबासका लागि तीन तल्ला हुनेछ । यहाँ छात्राबास निर्माण भएसँगै पूर्वी पहाडी जिल्ला र मधेश प्रदेशबाट आउने छात्रालाई डेरा बस्नुपर्ने बाध्यता अन्त्य हुने क्याम्पस सञ्चालक समिति शैक्षिक अनुगमन तथा सुपरिवेक्षण समितिका संयोजक शिवराज दाहालले बताए ।
विशेषगरी, दुर्गम तथा आर्थिक रुपमा कमजोर परिवारका विद्यार्थीलाई शिक्षामा पहुँच पु¥याउन छात्रावासले लाभ पुग्ने क्याम्पस प्रमुख प्राध्यापक डाक्टर गीता अधिकारीले बताइन् । छात्रावासले गर्दा विद्यार्थीहरुको शैक्षिक उपलब्धीमा सकारात्मक प्रभाव पर्ने विश्वास लिइएको छ । छात्रावासका कारणले गर्दा विद्यार्थीहरुको नियमित उपस्थिती र अध्ययनमा निरन्तरता हुने सहायक क्याम्पस प्रमुख सञ्जिव यादवले बताए ।
पछिल्लो समय जनता क्याम्पसमा पढ्न आउने विद्यार्थीका लागि सात वटा वस सेवा पनि सञ्चालन गरि विद्यार्थीलाई निःशुल्क सेवा प्रदान गर्दै आएको छ । वसमार्फत सुनसरीको बराहक्षेत्र, दुहवी, इनरुवासहित पूर्व मोरङ्को विराटचोससम्मका विद्यार्थीलाई सहजता भएको छ । इटहरीभर विद्यार्थीलाई पनि थप सुविधा भएको छ ।
क्याम्पसले छ महिनाअघि विदेशी दुईवटा प्रतिष्ठित विश्वविद्यालयसँग सम्झौता समेत गरेको थियो । जसमा भारतको हरियाणमा रहेको बाबा मस्तनाथ र भारतकै राजस्थानमा रहेको श्री जे जे टि विश्वविद्यालयसँग सम्झौता गरेको थियो । सो सम्झौतापछि पुस ५ र ६ गते दुई दिने अन्तर्राष्ट्रिय शैक्षिक सम्मेलन समेत गरेको थियो ।

विश्वविद्यालय अनुदान आयोग नेपालबाट गुणस्तर सुनिश्चितता प्रत्यायानको प्रमाणपत्र प्राप्त गर्न सफल जनता क्याम्पसमा स्नातक तहमा बिएड, बिबिएस, बिए, बिआइसिटिई तथा स्नातकोत्तरतर्फ एमएडसँगै एमबिएसका शैक्षिक कार्यक्रम सञ्चालन गरेको छ । कक्षा ११ र १२ का शैक्षिक कार्यक्रम पनि सञ्चालन गरेको छ । यहाँ छ हजारभन्दा बढी विद्यार्थी अध्ययनरत छन् ।