लैंगिक हिंसा विरुद्धको आवाज सहित १११ औँ नारी दिवस मनाइयो

इनरुवा । सुनसरीको भोक्राहा नरसिंह गाउँपालिकाको आयोजनामा सोमबार महिलाको सुरक्षा सम्मान र रोजगार, समृद्ध नेपालको आधार सहित १११ औँ नारी दिवस मनाइएको छ ।
१११ औँ नारी दिवस कार्यक्रम भोक्राहा नरसिंह गाउँपालिकाकी उपाध्यक्ष पुनम कुमारी मेहताको अध्यक्षता तथा संविधान सभा सदस्य सविता देवी यादवको प्रमुख आथित्यता भएको हो ।
कार्यक्रममा गाउँपालिकाकी उपाध्यक्ष मेहताले भनिन् नेपाली नारीहरु माथी २१ औँ शताब्दीको यो वैज्ञानिक युगमा समेत पितृसत्तात्मक सोच, अशिक्षा र गरिबीका कारण महिलाहरुमाथी विभेद बढ्दैँ गएको बताइन् ।
उनले भनिन् विभेदपूर्ण कानुनका कारण देशको विभिन्न ठाउँमा जबरजस्ती करणी, यौन दुर्वयवहार एसिड आक्रमण, आगो लगाउने, घरेलु हिंसा, सामाजिक अपहेलना, दाइजो प्रथा जस्ता अमानवीय व्यवहारका कारण नेपाली महिला दिनानुदिन पिडित बन्दैँ गएपनि सरकार उदासिन रहेको बताइन् ।
एक हातले ताली बज्दैँन, नेपाली उख्खान टुक्का भने जस्तै हाम्रो समाज एक रथका दुई पांग्रा र एक सिक्कामा दुई पाटाको रुपमा नारी पुरुष समान रहेको भन्दै भोक्राहा नरसिंह गाउँपालिका पछिल्लो समय महिला मैत्री बन्दैँ गएको उनले कार्यक्रममा उद्धघोष गरिन् ।
त्यस्तै कार्यक्रममा भोक्राहा नरसिंह गाउँपालिका वार्ड नं. ३ का वडाध्यक्ष सुकदेव यादवले भने प्रत्येक वर्ष मार्च ८ मा मनाइने अन्तर्राष्ट्रिय नारी दिवस कुनै उत्सव नभई उत्पीडित महिलाको लैंगिक हिंसा विरुद्धको आवाज सोमबार गाउँपालिकामैँ एक कार्यक्रमको आयोजना गरी मनाएकोमा खुशी व्यक्त गरे ।
वडाध्यक्ष यादवले भने महिलाहरुको सशक्तीकरणका लागि भोक्राहा नरसिंह गाउँपालिकाका सम्पुर्ण महिलाहरुलाई एकजुट भएर अगाडी बढ्नुु पर्ने बताए ।
उनले भने हाम्रो समाजमा नारीलाई विद्याकी देवी लक्ष्मी, सरस्वती र शक्तिकी देवी दुर्गा भनेर पूजा गर्ने महिलालाई भने पुरुष समान व्यवहार अझैँ गर्न नसकेको बताए ।
नारी दिवस कार्यक्रममा भोक्राहा नरसिंह गाउँपालिका वार्ड नं. ४ का वडाध्यक्ष हारुण अंसारी भने महिला हिंसा अन्त्य गरी भय रहित वातावरणमा महिलाले जीवन जिउन सक्ने अवस्थाको सृजना गर्नु पर्ने बताए ।
यता सो कार्यक्रमकी प्रमुख अथिती सविधान सभा सदस्य सविता यादवले भने नेपालको इतिहासमै पहिलो पटक संविधान सभाबाट जारी भएको नेपालको संविधान २०७२ ले केन्द्रदेखि स्थानीय तहसम्मको संघीय संरचनामा प्रमुख वा उपप्रमुख मध्ये एक महिला हुनुपर्ने बाध्यकारी व्यवस्थाले राज्यका सबै निकायमा महिलाको पहुँच स्थापित गरेपनि हाल सम्म महिला हिंसा नरोखिएको प्रति आफु दुखी रहेको बताईन् ।

संविधानको धारा ३८ मा महिलाको हक संरक्षित गरी सो हक हनन भएको खण्डमा संवैधानिक उपचारको व्यवस्था गरेपनि व्यवहारगत रुपमा हुने हिंसालाई नियन्त्रण गर्न मुलुकी फौजदारी अपराध संहिता २०७४ मा महिला विरुद्धका कसूरलाई जघन्य कसूरको रुपमा स्थापित भएपनि महिला अझैँ सुरक्षित हुन नसकेको बताइन् ।
कार्यक्रममा भोक्राहा नरसिंह गाउँपालिका वार्ड नं. ८ का वडाध्यक्ष हात्तिम अंसारी भने तराई मधेशमा पछिल्लो समयमा बढ्दै गइरहेको महिला तथा बालिका विरुद्धका जबरजस्ती करणी सम्बन्धी कसूर साथै करणी पश्चात क्रुर यातना दिई ज्यानै लिने अपराधले प्रत्येक महिलालाई जीवन जिउने सन्दर्भमा महिलाहरु माथी त्रासको वातावरण सृजना भएको बताए ।
महिलाहरुलाई हुने त्रास नियन्त्रण गर्ने कार्यकारी निकाय, नियमन गर्ने नियामक निकाय र न्याय दिलाउने स्वतन्त्र, स्वच्छ एवं सक्षम न्यायपालिका हुँदाहुँदै पनि दिनहुँजसो घट्ने लैंगिक एवं यौन हिंसा विरुद्धका कसूरमा राज्यको यथेष्ठ ध्यान पुग्न नसकेको जिकिर गरे ।
हाम्रो समाजमा घट्ने कतिपय यस्तै घटनाहरु त पीडितले आप्नो इज्जत, डर, प्रतिष्ठा र धम्कीको कारण लुकाई छिपाई राखि सार्वजनिक गर्न नसकेको बताए ।
सार्वजनिक भएका कतिपय घटनाहरुमा वास्तविक अनुसन्धान नहुनु, दोषी पनि जमानत तथा धरौटीमा छुट्नु तथा अन्तिम फैसलामा उन्मुत्ति दिई सफाई दिँदा यी र यस्ता घटनाले थप प्रश्रय पाउने अवस्थाको विद्यमानता निर्विकल्प भएको बताए ।कार्यक्रममा भोक्राहा नरसिंह गाउँपालिकाकी प्रशासन शाखा प्रमुख बसन्त प्रभा खनाल, रोजगार संयोजक शोभा मेहता, राजश्व शाखा प्रमुख टिका देवी पौडेल, कृषि शाखा प्रमुख रेनुका चौधरी, महिला विकास शाखा प्रमुख तुलसा निरौला लगायतका विभिन्न सामुदायीक तथा धार्मिक स्कुलका विद्यार्थी, शिक्षक तथा गाउँपालिकामा कार्यत्तरक्त कर्मचारीहरुको उपस्थिती रहेको थियो ।