फोहोर उठ्न नसक्दा चोक–गल्लीमा फोहोर

काठमाडौं – काठमाडौंको फोहोर एक हप्तादेखि उठ्न नसक्दा चोक–गल्लीमा फोहोरका डंगुर थुप्रिन थालेको छ ।

काठमाडौं महानगरपालिकाको फोहोर व्यवस्थापन हुने नुवाकोटको सिसडोल ल्यान्डफिल्डका स्थानीयले फोहोर व्यवस्थापन गर्न नदिँदा फोहोर उठ्न नसकेको हो ।

विगत १३ वर्षदेखि व्यवस्थापन हुँदै आएको नुवाकोटको सिसडोलस्थित ल्यान्डफिल्ड साइटका स्थानीयले विभिन्न माग राख्दै अवरोध गर्दा फोहोर उठ्न नसकेको काठमाडौं महानगरपालिकाका प्रवक्ता ईश्वरमान डंगोलले बताए । स्थानीयले चैत १३ गतेदेखि फोहोर व्यवस्थापनम अवरोध गरेको उनले बताए ।

‘‘फोहोरमैला प्रभावित क्षेत्र शिक्षक व्यवस्थापन संघर्ष समितिले शिक्षक दरबन्दी पूर्तिलगायत माग राख्दै फोहोर व्यवस्थापनमा अवरोध गर्दै आएका छन्,” उनले भने, “दैनिक ल्यहाँ करिब २०० फोहोरका गाडी लगिँदै आएको थियो ।”

उपत्यकाका स्थानीयले महानगरले कर उठाउने तर फोहोरको व्यवस्थापन गर्न नसकेको गुनासो पोख्दै आएका छन् । स्थानीय प्रमिला वैद्य महानगरले फोहोर व्यवस्थापन गर्न नसक्दा सहर दुर्गन्धित बनेको बताइन् । फोहार व्यवस्थापनमा महानगर एक हप्तादेखि बेखबर भएको आरोपसमेत उनले लगाइन् । ‘‘दोस्रो लहरको कोरोना महामारी फैलिएको बेलामा झनै फोहोरको सास्ती छ,” उनले भनिन् ।

यस विषयमा छलफल भइरहेको महानगरका वातावरण व्यवस्था विभागका प्रमुख हरिकुमार श्रेष्ठले बताए ।

महानगरपालिकाले दीर्घकालीन ल्यान्डफिल्डका लागि बञ्चरेडाडाँमा १७ रोपनी जग्गा अधिग्रहण गरिसकेको छ । तर, निर्माणकार्य अझै सम्पन्न गर्न सकेको छैन ।

बुधबारको छलफलमा महानगरका मेयर विद्यासुन्दर शाक्यले प्रभावित क्षेत्रको पूर्वाधार विकासका लागि ६ करोड रुपैयाँ दिने घोषणा गरेका छन् । शाक्यले प्रभावित क्षेत्रका विद्यालयहरुमा आवश्यक तहगत र विषयगत ५१ जना शिक्षकको दरबन्दी पूरा गर्ने सन्दर्भमा सरकारबाट स्थायी पदपूर्ति गरेपछि स्वतः हट्ने गरी तत्कालका लागि करारमा शिक्षक नियुक्त गरिने बताए । यसका लागि महानगरले अनुदान रकम उपलब्ध गराउने उनले जानकारी दिए ।

बञ्चरेडाँडा र कँडुलेलाई केन्द्र मानेर मापदण्डका आधारमा वरिपरि निश्चित दूरीभित्र पर्ने व्यक्तिका जग्गा अधिग्रहण गर्नुपर्ने, फोहोर वैज्ञानिक व्यवस्थापन, ओखरपौवा ल्यान्डफिल साइटको पोस्ट क्लोजरको योजना, स्थानीय पूर्वाधार, स्वास्थ्य र शिक्षा क्षेत्रको प्रवर्द्धनका लागि सहयोगजस्ता विषयमा छलफल हुँदै आएको छ । फोहोर व्यवस्थापनकै लागि आज पनि महानगरमा बैठक बस्दै छ ।