पत्रकारको सम्पर्क कार्यालयमा सुकुम्बासी आयोगको बोर्ड

इनरुवा । सुनसरी सदरमुकाम इनरुवामा स्थाप्ना गरिएको नेपाल पत्रकार महासंघको कार्यालयमा भूमिसम्बन्धी समस्या समाधान आयोग (सुकुम्बासी आयोग)को कार्यालय स्थापना गरिएको छ ।
नेपाल पत्रकार महासंघ सुनसरीको सम्पर्क कार्यालयको स्थाप्ना राष्ट्रिय सूचना आयोगका आयुक्त र नेपाल पत्रकार महासङ्घ सुनसरी शाखाका तत्कालीन सभापति अमर खड्काले गरेका थिए ।
नेपाल पत्रकार महासङ्घ सुनसरी शाखा मातहत निकै प्रचार–प्रसारसहित सदरमुकाम इनरुवामा २०७५ पुस १६ गतेबाट सञ्चालन गरिएको उक्त सम्पर्क कार्यालयका सामान हटाएर २०७७ चैत २९ देखि भूमिसम्बन्धी समस्या समाधान आयोग (सुकुम्बासी आयोग)को कार्यालय स्थापना गरिएको छ ।
जिल्ला समन्वय समिति सुनसरी (जिसस)को कार्यालयले सँगै रहेको भवनमा पत्रकार महासङ्घ सुनसरी शाखाको सदरमुकाम सम्पर्क कार्यालय लागि कोठा उपलब्ध गराएको थियो । तत्कालीन समयमा सञ्चालनमा रहेको जिल्ला प्रशासन कार्यालयको प्रमुख जिल्ला अधिकारीको कार्यकक्षलाई महासङ्घको इनरुवा सम्पर्क शाखाका रूपमा प्रयोगमा ल्याइएको थियो ।

हालै स्थापना गरिएको सुकुम्बासी आयोगको कार्यालय

राष्ट्रिय सूचना आयोगका आयुक्त किरण पोखरेलसहित जिसस सुनसरीका प्रमुख गोपाल राजभण्डारी र नेपाल पत्रकार महासङ्घ सुनसरी अध्यक्ष अमर खड्काले संयुक्त रूपमा उक्त सम्पर्क कार्यालयको उद्घाटन गरेका थिए । तर केही दिनपछि नै जिससले आफूहरूलाई कोठाको आवश्यकता रहेको भन्दै पुनः फिर्ता मागेको इनरुवाका पत्रकार अजित झा बताउँछन् ।
‘हामीलाई जिससले अनुदानमा कार्यालय उपलब्ध गराएको थियो,’ झाले भने, ‘हाम्रो पनि आ–आफ्नै कार्यालय भएका कारण त्यहाँ खासै समय दिन सकेनौँ । उद्घाटन भएको केही दिनपछि नै जिससले कार्यालय फिर्ता मागेको थियो ।’
पत्रकार सम्पर्क कार्यालयका लागि जिससले नै फर्निचरलगायत आवश्यक पूर्वाधार उपलब्ध गराएको थियो । पत्रकारलाई दिइएको फर्निचर र संरचना पुनः खोसेर लिएको बारे जिज्ञासा राख्दा पत्रकार महासङ्घ सुनसरीका तत्कालीन अध्यक्ष अमर खड्काले सो कार्यालयमा पत्रकारहरूको सक्रियता कम भएका कारण व्यवस्थापन गर्न नसकिएको बताए । इनरुवामा आफ्नै कार्यकालमा सम्पर्क कार्यालय स्थापना गरिएको भए पनि त्यसलाई व्यवस्थापन गर्न नसकिएको उनको भनाइ छ ।

इनरुवामा सम्पर्क कार्यालय स्थापना गरेपछि सामूहिक तस्बिर खिचाउँदै पत्रकारहरू

‘मैले पनि आयोगको अफिस बसेको छ भन्नेबारे सुनेको हुँ,’ उनले भने, ‘यसबारेमा बुझ्नेछु । सम्पर्क कार्यालय बन्दै भइसकेको होइन । त्यो स्थानमा अरू कोही आएका हुन् । तर कार्यालयमा पत्रकार साथीहरूको सक्रियता कम भएका कारण म्यानेज गर्न कठिन भएको हो ।’

पत्रकार महासङ्घ सुनसरीका नव निर्वाचित अध्यक्ष जनकऋषि राईले भने आफ्नो पदस्थापना भइनसकेका कारण यस विषयमा केही बताउन नसक्ने जनाए ।

पत्रकारको सम्पर्क कार्यालय थाहा छैन- आयोग

जिससले उपलब्ध गराएको तत्कालीन पत्रकार सम्पर्क कार्यालयलाई आइतबारदेखि सुकुम्बासी आयोगले आफ्नो कार्यकक्ष बनाएको बारे जिज्ञासा राख्दा सुकुम्बासी आयोग सुनसरीका अध्यक्ष खेमराज पोखरेल त्यहाँ यसअघि पत्रकारको कार्यालय रहेको आफूलाई थाहा नभएको बताए ।
आफूलाई कार्यालय चाहिएकोले जिसससँग आफूहरूले कार्यालयको माग गरेको बताउँदै अध्यक्ष पोखरेलले भने, ‘पहिले यहाँ केको अफिस थियो भन्ने विषयमा म जानकार भइनँ । तर जहाँसम्म मलाई लाग्छ, केही समयदेखि त्यो हल खाली थियो । मान्छे बसेको जस्तो पनि लागेन । अहिले जिससकै अनुमतिमा सरसफाइ गरेर कार्यालय उद्घाटन गरेका हौँ ।’
‘सम्भवतः यसअघिको कार्यालय सञ्चालन नभएरै हामीलाई यो कोठा उपलब्ध गराइएको होला,’ पोखरेलले भने, ‘पूर्वाधार हेर्दा यहाँ धेरै समयदेखि मान्छे नबसेको जस्तो थियो । त्यहाँ इनरुवा २ नम्बर वडा कार्यालयले वितरण गर्न बाँकी राखेका केही सामग्री थिए, तिनैलाई हटाएर हामी बसेका हौँ ।’
नेपाल पत्रकार महासङ्घको धरानमा जिल्ला शाखा कार्यालय रहेको छ । सदरमुकाम बिटमा कार्यरत पत्रकारहरूले इनरुवामा पनि कार्यालय हुनुपर्छ भन्ने माग गर्दै आएका छन् ।