अनुदानमा कृषि सामग्री वितरण

इनरुवा । सुनसरीको भोक्राहा नरसिंह गाउँपालिका वार्ड नं. १ बलुवाटारका किसानहरुलाई अनुदानमा कृषि सामग्री वितरण गरिएको छ । भोक्राहा नरसिंह गाउँपालिका अन्तरगत कृषि शाखाले बाली विकास तथा जैविक विविधता संरक्षण केन्द्र अन्तरगतको मकै उत्पादन प्रवद्र्धन कार्यक्रमका लागि किसानहरुको लागि ५० प्रतिशत अनुदानमा भोक्राहा साना कृषि सहकारी संस्था लिमिटेड मार्फत कृषि सामग्री उपलब्ध गराएको कृषि शाखा प्रमुख रेनुका चौधरीले जानकारी दिइन् । कृषि शाखा प्रमुख चौधरीका अनुसार मकै बालीमा किसानहरुलाई आत्मनिर्भर बनाउनका लागि सरकारले उपलब्ध गराएको अनुदानको रकमको सही सदुपयोग गर्दै ५० प्रतिशत अनुदानमा आवश्यक कृषि सामग्री संस्था मार्फत वितरण गरिएको बताइन् । मंगलबार भोक्राहा साना कृषि सहकारी संस्था लिमिटेड भोक्राहा नरसिंह वार्ड नं. १, बलुवाटार, सुनसरीले किसानहरुलाई ५० प्रतिशत अनुदानमा २ हर्ष पावरको पानी तान्ने विद्युतिय मोटर,पावर स्प्रे मेसिन र त्रिपाल वितरण गरिएको छ भने किसानहरुलाई आवश्यकता अनुसार जिंग सतप्रतिशत अनुदानमा वितरण गरिएको संस्थाका अध्यक्ष उमेश कुमार मेहताले जानकारी दिए । उनको भनाई अनुसार २ हर्ष पावरको पानी तान्ने विद्युतिय मोटर १६ जना वितरण गरिएको छ भने २३० जना किसानहरुलाई त्रिपाल र १०८ जना किसानहरुलाई पावर स्प्रे मेसिन वितरण गरिएको हो । कार्यक्रमका प्रमुख अतिथी तथा भोक्राहा नरसिंह गाउँपालिकाकी कार्यवाहक अध्यक्ष पुनम कुमारी मेहताले कृषकहरुलाई आगामी दिनमा पनि आवश्यक कृषि सामग्री वितरण गरीने बताइन्् । उनले कार्यक्रममा बोल्दैँ किसानहरुलाई सहजताका लागि अनुदानमा उपलब्ध गराएको विद्युतीय मोटर, त्रिपाल, पावर स्प्रे मेसिन, जिंक लगायतका कृषि समग्रीलाई सही सदुपयोग किसानहरुसँग आग्रह गरिन् । कार्यवाहक अध्यक्ष मेहताले कृषि क्षेत्रलाई प्राथमिकतामा राखेर आफू अगाडि बढ्ने जानकारी गराउँदै किसानहरुको समस्या र मर्कालाई बुझेर सम्बोधन हुने गरि अगामी आर्थिक वर्षमा बजेट ल्याउने भन्दै प्रतिवद्धता व्यक्त गरिन् । यता सो कार्यक्रमका विशिष्ट अतिथी एंव भोक्राहा नरसिंह गाउँपालिका वार्ड नं. १ का वडाध्यक्ष ललित कुमार थापाले भने यस क्षेत्रमा सुख्खा जमिन भएकोले गर्मी मौसममा तरकारी लगायतका अन्यबाली नालीमा समेत किसानहरुको घरघरमा आवश्यक कृषि सामग्री नहुँदा बालीनालीमा क्षति हुने गरेको बताए । उनले भने यस वर्ष बाली विकास तथा जैविक विविधता संरक्षण केन्द्र अन्तरगतको मकै उत्पादन प्रवद्र्धन कार्यक्रम अन्तरगत यस वडाका किसानहरुलाई ५० प्रतिशत अनुदानमा कृषि सामग्री उपलब्ध गराएपछि किसानहरु केही मात्रामा सहज भएको बताए । यता कार्यक्रममा भोक्राहा नरसिंह गाउँपालिका वार्ड नं. २ का वडाध्यक्ष आलम अंसारी, वार्ड नं. ४ का वडाध्यक्ष हारुण अंसारी, नेकपा एमाले भोक्राहा गाउँ कमिटीका अध्यक्ष रामकुमार मेहता, पशुपति शिक्षा मन्दिर भोक्राहा नरसिंह वार्ड नं.२ का प्रधानाध्यापक पवन कुमार मेहता, श्यामा श्याम कृषि सहकारी संस्था भोक्राहा नरसिंह वार्ड नं. १ का प्रविन कुमार मेहता, भोक्राहा नरसिंह गाउँपालिका सहकारी शाखा प्रमुख सिताराम मेहता, आयोजक संस्थाका उपाध्यक्ष सुरेन्द्र मेहता लगायतको उपस्थिती रहेको थियो ।