मापसे गरेर मध्यरातमा दुर्घटना,कानुनी कारबाही गर्नुको सट्टा ‘मिलापत्र’

विराटनगर / मादकपदार्थ सेवन गरेर गाडी चलाई पार्किङ गरिराखेको गाडीमा ठक्कर दिने मार्बल व्यवसायी त्रिदेव रायलाई प्रहरीले कानुनी कारबाही गर्नुको सट्टा ‘मिलापत्र’ गराएर उन्मुक्ति दिएको छ ।

शनिबार राति ११ बजेतिर विराटनगर–४ पिपलचोक, सडकछेउ रोकिराखेको प्रदेश १–०१–०२५ च ७७०४ नम्बरको कारलाई विराटनगर–५ का मार्बल व्यवसायी त्रिदेव रायले चलाएको वाग्मती प्रदेश ०१–०२५ च ७८१९ नम्बरको कारले पछाडिबाट ठक्कर दिएको थियो ।
ठक्कर दिने गाडीमा विराटनगर–५ कै मार्बल व्यवसायी देवेन्द्र चापागाई पछाढि बसेका थिए । उनी रायभन्दा केही कम मातेका थिए ।

मापसेले लठ्ठ रायले दुर्घटना गराए पनि प्रहरीले उनलाई पक्राउ गरेन । बरु गाडीपछाडि बसेका चापागाईलाई पक्रेर लग्यो । मेडिकल गर्दा उनले पनि मापसे गरेको देखियो ।

प्रहरीले मापसे गरेर गाडी चलाउने रायलाई भगाउन साथ दिने चापागाईलाई भने रातभरि जिल्ला प्रहरी कार्यालय मोरङ कार्यालयमा लगेर राखेको थियो ।

घटनाका एक प्रत्यक्षदर्शीका अनुसार राय खुट्टा टेक्न नसक्ने अवस्थामा सो स्थानबाट कार लिएर भागेका थिए । त्यसअघि नियन्त्रणमा लिन सकिने अवस्था भए पनि प्रहरीले उनलाई पक्राउ गरेन । न दुर्घटना गराउने कारलाई नै नियन्त्रणमा लिइयो ।

मापसे गरेर दुर्घटना गराउँदा चालकलाई ट्राफिक नियम उल्लङ्घन गरेको कसुरमा कारबाही हुनुपर्ने हो । तर जिल्ला प्रहरी कार्यालय मोरङले दुर्घटना गराउने चालक र गाडीलाई नियन्त्रणमा नलिई छाडिदिएको छ ।

कुनै सवारीसाधनका चालकले दुर्घटना गराएमा तत्काल नियन्त्रणमा लिएर स्वास्थ्य परीक्षण गराउनुपर्ने हुन्छ । तर मापसे गरेर भएको दुर्घटनाजस्तो संवेदनशील विषयमा मोरङ प्रहरीले आवश्यक गम्भीरता देखाएको पाइएन ।

दुर्घटना गराएर फरार भएमा प्रहरीले पछि नियन्त्रणमा लिई कानुनअनुसार कारबाही अगाडि बढाउनुपर्नेमा दुर्घटना गराउने चालकलाई उपस्थित नै नगराई ‘मिलापत्र’ भएको भन्दै छाडिएको छ ।

यस विषयमा जिज्ञासा राख्दा प्रहरीले पक्राउ गरेका चापागाईले दुई पक्ष सहमति भएपछि कुरा मिलेको बताए । उनले ‘सामान्य विवाद’ परेका कारण आफुलाई प्रहरीले लगेको पनि बताए ।

पछि गाडीधनीसँग कुरा भएपछि क्षति भएको बनाइदिने सर्तमा सहमति भएको उनले जानकारी दिँदै चाापगाईले भने, ‘सामान्य विवाद भएका कारण मलाई लग्नुभएको हो, चालक र गाडीलाई लग्नुभएन ।’

स्रोतका अनुसार चापागाईको मेडिकल गर्दा मापसे गरेको देखिएको थियो । चालक रायले खुट्टा टेक्न नसक्ने अवस्थामा गाडी लिएर हिँडेका थिए । तर चापागाईले चालक रायले मापसे नगरेको भनेर ‘मित्र ढाकछोप’ गर्ने प्रयास गरेका थिए ।

जिल्ला प्रहरी कार्यालय मोरङमा दुर्घटना गराउने गाडी र त्यसको कागजपत्र केही पनि छैन । ‘सामान्य दुर्घटना’ भएका कारण पीडित र पीडक दुवै पक्ष मिलेपछि छोडिएको प्रहरीको भनाइ छ ।

मोरङ प्रहरी प्रवक्ता डिएसपी दीपक श्रेष्ठले भने चालकलाई कारबाही गरेर छोडिएको बताए । उनले क्षति भएको कार बनाइदिने सहमतिमा दुवै पक्ष मिलिसकेको बताए । चालक रायलाई ‘मापसे कारबाही गरिएको’ बताउँदै उनले भने, ‘दुई पक्ष आपसमा सहमति गरेर गए । चालक रायलाई ट्राफिक नियम उललङ्घन गरेको विषयमा जरिवाना कारबाही गरिएको छ ।’

तर मोरङ प्रहरीले रायलाई ट्राफिक नियम उललङ्घन गरेको विषयमा कारबाही गरेको बताए पनि जिल्ला ट्राफिक प्रहरी कार्यालयमा नपठाएको पाइएको छ ।

गाडी जिल्ला प्रहरी कार्यालयमा नै रहेको भन्ने जानकारी आएको जिल्ला ट्राफिक प्रहरी कार्यालयका सई शिवकुमार शर्माले बताए । सबै कागजपत्र जिल्ला प्रहरी कार्यालयमा नै भएको जानकारी गराउँदै सई शर्माले भने, ‘मिलापत्र भइसकेपछि जिल्ला प्रहरी कार्यालयले जरिवाना तिर्न पठाउँछ, त्यसपछि मात्रै हामीले जरिवाना गरेर पठाउने हो ।’स्रोतः कोशी अनलाइन