गैरकानूनी मिटरब्याजमा लगानी, सर्वसाधारणलाई उठिबास

विराटनगर । गैरकानूनी मानिएको मिटरब्याजमा लगानी गरि सर्वसाधारणलाई उठिबास लगाउने कुख्यात मिटरब्याजीको रूपमा परिचत छन् विराटनगर–९ घोगापुलचौकका मन्टु भनिने सञ्जयप्रसाद रौनियार ।

उनी ठगी र अपराधिक लाभ लिएको मुद्दामा १७ फागुनदेखि मन्टु पुर्पक्षको लागि मोरङ कारागारमा छन् । उनीविरुद्धको मुद्दा विचारधिन छ । जेलभित्र रहेका मन्टु वकपत्र उल्टाएर जेलमुक्त हुने तयारी सुरू गरेका छन् । जेलभित्रबाटै मन्टुले पीडितहरूलाई दबाब र प्रलोभनमा पारेर वकपत्र उल्ट्याउने र थुनामुक्त हुने योजना सुरु गरेका हुन् ।

उनलाई किर्ते कपाली तमसुक बनाएर धाकधम्की दिँदै अकुत ब्याज असुलेर अपराधिक कार्य गरेको आरोप छ । १७ जना पीडितहरुले जालझेल गर्दै चर्को मिटर ब्याज असुलेर धितो राखेको सम्पत्ती हडपिएको आरोप लगाउँदै मन्टुविरुद्ध मोरङ प्रहरीमा किटानी जाहेरी दिएका थिए । मोरङ प्रहरीले २०७७ मंसिरमा मन्टुलाई पक्राउ गरेर अनुसन्धान गरि ठगी र अपराधिक लाभ लिएको कसुरमा जिल्ला अदालत मोरङमा अलग–अलग मुद्दा दर्ता गराएको थियो ।

अदालतको आदेशबाट पुर्पक्षका लागि जेल चलान भएका कुख्यात मिटरब्याजी मन्टुले जेलभित्रैबाट सबै पीडितहरुको सम्पत्ती फिर्ता दिएर अदालतमा बकपत्र फेर्न लगाइसकेका छन् । स्रोतका अनुसार मन्टुले सम्पत्ती फिर्ता दिँदा पनि बयान फेर्न नमान्नेलाई गुण्डा प्रयोग गरेर धाकधम्की पनि दिएका थिए । यसैले अदालतमा वादी पक्षका सबैले बकपत्र उल्टाइसकेको अदालत स्रोतले बताएको छ । ‘पीडित भनिएका वादीले फैसला हुनुभन्दा अगाडि हुने बकपत्रमा बयान फेरेकोले कुख्यात मिटर व्याजी मन्टुले अदालतबाट सफाई पाएर थुनामुक्त हुने सम्भावना बढेर गएको छ,’ अदालत स्रोतले भन्यो ।

वर्षौदेखि घरजग्गा धितो पास गराएर नक्कली कपाली तमसुक बनाएर चर्को ब्याज असुलेको आरोपमा मन्टुविरुद्ध १७ जना पीडितहरुले अलग–अलग अपराधिक लाभ लिएर ठगी गरेको आरोपमा किटानी जाहेरी दिएका थिए । मोरङ अदालतका तत्कालिन न्यायाधीश इश्वरी पराजुलीको इजलासले सुनवाई भएका १७ वटा अलग–अलग मुद्दामध्ये ४ वटामा धरौटी लिएर र १३ वटा मुद्दामा पुर्पक्षका लागि चेल चलान गर्न आदेश दिएका थिए ।

अभियोगपत्रमा मन्टुविरुद्ध १ करोड ९२ लाख ८५ हजार रुपैयाँ क्षतिपूर्ति माग दाबी गरिएको छ । मन्टुले सर्वसाधारणबाट ९२ लाख कर्जाको ७ करोड ७० लाख रुपैयाँ असुली गरेको पीडितहरुको जाहेरीबाट खुलेको छ । यसैगरी मिटर ब्याजी मन्टु र उनकी श्रीमतीले जिल्ला मातपोत कार्यालय मोरङबाट तीस जनाभन्दा बढीबाट जग्गा आफ्नो नाममा राजीनामा नामसारी गराएको फेला परेको थियो । मन्टुविरुद्ध सम्पत्ती शुद्धीकरण विभागमा पनि उजुरी दर्ता भएको थियो । मन्टु कतिसम्म धुर्त थिए भने उनले मरिसकेका बाबुको सही किर्ते गरेर भाइलाई वञ्चित गर्दै एकलौटी घरबहाल सम्झौता गरेर भाडा खाँदै आएका थिए । विराटनगर बुद्धचौकमा रहेको घर अस्पताललाई भाडा लगाएर मासिक डेढ लाख भाडा लिएपनि मन्टुले ४० हजार मात्र लिएको कर छलि गरेका थिए ।

मिटरब्याजमा लगानी गर्ने मन्टुले सर्वसाधरणको जग्गा नामसारी गरि कपाली तमसुक बनाएर ऋण दिने गरेका थिए । कानुनी मान्यता अनुसार १० प्रतिशतभन्दा बढी ब्याज लिन नपाउने प्रावाधान रहेको छ । तर, मन्टुले ऋण दिएपछि सर्वसाधरणसँग ६÷६ महिना भित्र तिरेमा सयकडा ३ का अर्थात् वार्षिक ३६ प्रतिशत ब्याज लिने र यदी ६ महिना भन्दा बढी लगाएमा प्रत्येक ६÷६ महिनामा ब्याज सावाँमा जोडी सयकडा ५ अर्थात् ९वार्षिक ५६ प्रतिशत० गर्दै बढाउने गरेको अदालतमा दायर भएको अभियोग पत्रमा उल्लेख छ ।

अदालतमा दायर भएको मुद्दामा सरकारी वकिलको कार्यालयले १ करोड ९२ लाख ८५ हजार २ सय २६ रूपैयाँ क्षतिपूर्ति माग दाबी राखेको छ । समाजमा परम्परागतरुपमा चल्दै आएको सामन्ती प्रथा अनुसार साहु महाजन बनेर एक ऋणीसँग पटक–पटक ल्याप्चे लगाएर ब्याजदेखि स्याजसम्म एकै पटक असुल्ने मन्टुले करोडौं रुपैयाँ सर्वसाधरणबाट असुलेको खुलेको प्रहरीको अनुसन्धानबाट खुलेको छ ।

एक दशकदेखि गलत नियतिले ऋण दिएर गाउँका सोझासिधा सर्वसाधरणलाई ऋणि बनाएर मिटरब्याजको धन्दा चलाउने मन्टु र उनको श्रीमती ज्योति रौनियारको नाममा करोडौं मूल्य बराबरको ६० कित्ता जग्गा रहेको देखिएको छ । हालसम्म सर्वसाधारणको ४० कित्ता जग्गा सञ्जयको नाममा देखिएको छ । उनकी श्रीमती ज्योति रौनियारको नाममा २० कित्ता जग्गा राजीनामा पास गराइसकेको खुलेको छ ।

गैरकानुनी ढंगले अकुत सम्पती आर्जन गरेको र मिटरब्याजमा लगानी गरि मोरङका ग्रामिण क्षेत्रका सर्वसाधरणलाई ‘टाट’ पल्टाएपछि तीन जनाले २०७७ मंसिर ७ गते रौनियार विरूद्ध सम्पती शुद्धीकरण अनुसन्धान विभागमा उजुरी दर्ता गराएका छन् । विभागमा दर्ता भएको २१३१ नम्बरको उजुरीमाअनुसार ०७० सालयता रौनियारले अदालतमा सर्वसाधारणविरुद्ध तीन सयवटा लेनदेन मुद्दा दायर गरेको उल्लेख छ ।

मन्टुसँग मोरङको धनपालथान, जहदा, रंगेली, सुनवर्षी विराटनगरका विभिन्न गाउँका वासिन्दाले वैदेशिक रोजगारीको, घरायसी समस्या वा छोरा–छोरीलाई पढाउन पैसा आवश्यक पर्दा ऋण लिने गर्थे । तर मन्टुले गलत तरिकाले ती स्थानीवासीलाई ठगी गर्न थालेको उनीहरू बताउँछन् । मन्टुले मिटरब्याजमा ऋण दिएपछि गाउँ–गाउँमा एजेन्ट परिचालन गर्ने गरेको पीडितहरूले बताएका छन् । पीडितका अनुसार मिटरब्याजमा लगानी गरेको पैसा उठाउन एजेन्ट गाउँमा खटाउने गरेका थिए ।
पीडितलाई सहयोग गर्नेहरु त्रसित

दबाब र प्रलोभनमा पारेर सबैलाई बकपत्र उल्टाउन लगाएर थुनामुक्त हुन लागेको हल्ला चलेपछि पीडितलाई सहयोग गर्ने सहयोगीहरु कुख्यात मिटर ब्याजी मन्टुदेखि त्रसित हुन थालेका छन् । जेलमुक्त भएपछि मन्टुले बदलाको भवना राखेर सहयोगीहरु दुःख दिने मात्र नभएर ज्यानसमेत लिन सक्ने जोखिम बढेको सहयोगीहरू बताउँछन् । एक सहयोगीका अनुसार मिटर ब्याजी मन्टुबाट ठगिनेहरु अझै धेरै छन् । यसैले थुनामुक्त भएमा उनीहरु पनि जोखिममा पर्नेछन् ।श्रोतःहाम्रोमत