जिल्ला प्रहरी कार्यालय मोरङको निरीक्षण भ्रमण: “हर दुःखसुखमा प्रहरीको साथ र सहयोग गर्ने प्रतिबद्धता”

बिराटनगर । कोशी प्रदेश प्रहरी प्रमुख, प्रहरी नायव महानिरीक्षक (डीआईजी) राजन अधिकारीले जिल्ला प्रहरी कार्यालय मोरङको निरीक्षण भ्रमण गरेका छन्। पुस ८ गते सम्पन्न उक्त भ्रमणका क्रममा डीआईजी अधिकारीले “हर दुःखसुखमा प्रहरीको साथ र सहयोग गर्ने प्रतिबद्धता” दोहोर्याएका छन्।

निरीक्षणका क्रममा उनले जिल्ला प्रहरी कार्यालय मोरङमा रहेका विभिन्न शाखाहरू, हिरासत कक्ष, तथा कार्यालयको भौतिक पूर्वाधारहरूको अवलोकन गरेका थिए। यसपछि प्रहरी अधिकृत, इकाई प्रमुख, र अन्य प्रहरी कर्मचारीहरूसँग विशेष छलफल गर्दै उनले प्रहरी संगठनले दिएका जिम्मेवारीहरू सफलतापूर्वक वहन गर्न, संगठनको अपेक्षाबमोजिम कार्य गर्न, तथा चुनौती र समस्याहरू न्यायिक र पेशागत रूपमा समाधान गर्न निर्देशन दिए।

डीआईजी अधिकारीले प्रहरी कर्मचारीहरूलाई अनुशासनको पालना गर्दै भातृत्व भावका साथ सभ्य र जनमैत्री सेवा प्रदान गर्नुपर्नेमा जोड दिए। उनले भने, “प्रहरी सेवाको माध्यमबाट नागरिकहरूको विश्वास जित्नु नै प्रमुख दायित्व हो। यसका लागि सबै कर्मचारीले आफ्नो कर्तव्यप्रति ईमानदार रहनुपर्छ।”

यता डीआईजी अधिकारीले कोशी प्रदेशमा कार्यरत सबै प्रहरी कर्मचारीहरूसँगको सहकार्य र सहयोगमा आफू हर समय प्रतिबद्ध रहेको बताउँदै, कुशल अभिभावकका रूपमा संगठनभित्रको एकताका लागि दृढ रहने बताए। उनले प्रदेश प्रहरी प्रमुखका रूपमा संगठन र जनताको अपेक्षा पूरा गर्न सबैसँग सहकार्य गर्दै अघि बढ्ने बताए।

त्यस्तै निरीक्षण भ्रमणको क्रममा जिल्ला प्रहरी कार्यालय मोरङका प्रमुख, प्रहरी उपरीक्षक (एसपी) नारायण प्रसाद चिमरीयाले डीआईजी अधिकारीलाई मोरङ जिल्लाको शान्ति सुरक्षाको समग्र अवस्था, जनशक्ति व्यवस्थापन, सुरक्षा चुनौतीहरू, र भावी कार्ययोजनाबारे प्रस्तुति दिएका थिए। साथै, एसपी चिमरीयाले प्रदेश प्रहरी कार्यालयसँगको सहकार्यलाई अझ सुदृढ बनाउँदै चुनौतीहरू समाधान गर्न आवश्यक सुझाव पनि राखेका थिए।