सीमावर्ती क्षेत्र दसगजामा लागुऔषधविरुद्ध सचेतना अभियान तीव्र

लौकही | नेपाल–भारत सीमावर्ती क्षेत्र दसगजामा लागुऔषधको बढ्दो प्रयोग र त्यसको प्रतिकूल प्रभाव रोक्न जनस्तरमै सचेतना अभियान सुरु गरिएको छ। सुनसरीको कोशी गाउँपालिका–१ अन्तर्गतको लौकही र भारतीय सीमावर्ती क्षेत्र बेला आसपासका स्थानीय बासिन्दा, विद्यालय, युवा र सुरक्षाकर्मीको सहभागितामा जनचेतनामूलक कार्यक्रम सम्पन्न भएको हो।

सीमा क्षेत्रको खुला आवत–जावत, सहजरूपमा लागुऔषधको आपूर्ति र त्यसको प्रयोगबाट समुदायमा गम्भीर समस्या देखिन थालेपछि सशस्त्र प्रहरी बलको अगुवाइमा सचेतनामूलक कार्यक्रम आयोजना गरिएको हो।

कार्यक्रममा सशस्त्र प्रहरी बल नेपाल, नम्बर ४ गण हेक्वा, सुनसरीका सशस्त्र प्रहरी उपरीक्षक (एसपी) निर्मल थापाले सीमावर्ती क्षेत्रमा लागुऔषधको समस्या दिनप्रतिदिन गहिरिँदै गएको बताए। “सीमामा लागुऔषधको कारोबार मात्र होइन, यसको लतले युवावर्ग, विशेष गरी किशोरकिशोरीहरूमा विनाशकारी असर पारिरहेको छ,” उनले भने, “समस्या नियन्त्रणका लागि स्थानीयवासी, विद्यालय र अभिभावकसँग सहकार्य आवश्यक छ।”

थापाले नेपाली सुरक्षाकर्मी र भारतीय सुरक्षा निकायबीच समन्वय गरी संयुक्त रूपमा सीमा क्षेत्रमा पुगेर जनचेतना फैलाउने कार्यलाई प्राथमिकतामा राखिएको जानकारी दिए। “दुवै देशका सुरक्षाकर्मीको सहकार्य र सामुदायिक सहभागिताबाट मात्रै यो चुनौतीलाई परास्त गर्न सकिन्छ,” उनले थपे।

यसैबीच बीओपी लौकहीका सशस्त्र प्रहरी निरीक्षक नारायण प्रसाद गौतमले सीमा क्षेत्रमा लागुऔषधको ओसारपसार नियन्त्रणमा सशस्त्र प्रहरीले कडाइका साथ निगरानी गरिरहेको बताए। “सीमा क्षेत्रमा चाँडै सूचना संकलन, निगरानी र निगरानीमा आधारित तालिमहरू सञ्चालन गर्दैछौं,” गौतमले भने, “तर, यो मात्र सुरक्षाकर्मीको काम होइन। सामुदायिक जागरूकता र सहभागिता अपरिहार्य छ।”

कार्यक्रममा स्थानीय अभिभावक, शिक्षक, संघसंस्थाका प्रतिनिधि, युवा तथा सामाजिक अभियन्ताको उल्लेखनीय सहभागिता थियो। सहभागीहरूले सीमावर्ती क्षेत्रमा लागुऔषधको नियन्त्रणका लागि स्थायी संयन्त्र आवश्यक रहेको र यसमा दुवै देशका प्रशासन र सुरक्षाकर्मीको एकीकृत प्रयास हुनुपर्ने धारणा राखेकाे थियोे ।