जुगेश दास/ सुनसरी । सुनसरी जिल्लाको हरिनगर गाउँपालिका–६ स्थित भारतसँग सिमाना जोडिएको घुस्की नाकाबाट नेपाल प्रहरी र सशस्त्र प्रहरी बलको संयुक्त टोलीले ठूलो मात्रामा लागुऔषध गाँजा बरामद गरेको छ। मंगलबार राति सञ्चालन गरिएको विशेष संयुक्त अपरेसनमार्फत १,१२० किलोग्राम (११ सय २० केजी) गाँजा फेला पारिएको हो।
प्रहरीका अनुसार गाँजा प्लास्टिक र बोरामा विशेषरूपमा प्याक गरी जमिनमुनि लुकाइएको अवस्थामा भेटिएको हो। प्रारम्भिक अनुसन्धानबाट उक्त गाँजा अवैध रूपमा तस्करीका लागि भण्डारण गरिएको हुन सक्ने अनुमान गरिएको छ।
संयुक्त अपरेसन सशस्त्र प्रहरी बल बसन्तपुर, सशस्त्र प्रहरी बल घुस्की, अस्थायी प्रहरी चौकी घुस्की, ईलाका प्रहरी कार्यालय देवानगञ्ज तथा कप्तानगञ्ज सशस्त्र प्रहरी गणको सहभागितामा सञ्चालन गरिएको थियो।
घटनाबारे जानकारी दिँदै जिल्ला प्रहरी कार्यालय सुनसरीका प्रहरी नायव उपरीक्षक (डीएसपी) योगराज खतिवडाले भने, “प्रारम्भिक सूचनाको आधारमा समन्वित रूपमा अपरेसन सञ्चालन गरियो। सटीक सूचनाको प्रयोग, तालमेल र टोलीको सक्रियताले गर्दा ठूलो परिमाणमा गाँजा बरामद गर्न सफल भयौं। अनुसन्धानलाई थप अगाडि बढाइँदैछ।”
बरामद गाँजा घटनास्थलबाट संकलन गरी आवश्यक कानुनी प्रक्रिया तथा अनुसन्धानका लागि सम्बन्धित निकायमा बुझाइएको प्रहरीले जनाएको छ। यो बरामदगी पछिल्लो समय जिल्लामा भएको सबैभन्दा ठूलो लागुऔषध नियन्त्रणको सफलताका रूपमा लिइएको छ।
नेपाल प्रहरी र सशस्त्र प्रहरी बलले सिमा क्षेत्रमा अवैध क्रियाकलाप तथा लागुऔषध तस्करी नियन्त्रण गर्न अभियानहरू तीव्र पारिरहेको छ। यो घटनाबाट तस्करविरुद्धको अभियान थप प्रभावकारी बन्दै गएको प्रहरी स्रोतले जनाएको छ।
Discussion about this post