विराटनगरका दुई क्यासिनोमा छापा: २० जना पक्राउ, सञ्चालकसमेत नियन्त्रणमा

 इनरुवा । विराटनगरका दुई चर्चित क्यासिनोमा प्रहरीले एकैपटक मध्यरातमा छापा हान्दा २० जना पक्राउ परेका छन्। पक्राउ परेकामध्ये दुई जना भने क्यासिनोका सञ्चालक तहकै व्यक्ति रहेको खुलेको छ।

आइतबार राति गरिएको छापामा बिग होटल परिसरमा रहेको च्याम्पियन क्यासिनो र रत्ना होटलस्थित गोल्डेन क्यासिनो प्रहरीको निशानामा परेका हुन्। च्याम्पियन क्यासिनोका महाप्रबन्धक लोकेन्द्र बहादुर बस्नेत र गोल्डेन क्यासिनोका व्यवस्थापक रामकृष्ण बजगाँई नेपाली नागरिकलाई क्यासिनो प्रवेश गराएको आरोपमा नियन्त्रणमा लिइएका छन्।

मोरङ प्रहरीका उपरीक्षक कबित कटुवालका अनुसार पक्राउ परेका सबैमाथि जुवा ऐनअन्तर्गत मुद्दा दर्ता गर्ने तयारी भइरहेको छ। नेपाली नागरिकलाई क्यासिनो प्रवेश गराएर जुवा खेलाइँदै आएको सूचनाका आधारमा प्रहरीले लामो समयदेखि निगरानी गर्दै आएको र त्यसै क्रममा छापा हानिएको उनले बताए।

छापाका क्रममा गोल्डेन क्यासिनोबाट १४ जना र च्याम्पियन क्यासिनोबाट ६ जना नेपाली नागरिक नियन्त्रणमा परेका हुन्। तर, पक्राउ परेकाहरूको नाम भने प्रहरीले हालसम्म सार्वजनिक गरेको छैन।

नाम सार्वजनिक नगर्ने प्रहरीको निर्णयले भने शंका उत्पन्न गराएको छ। यसअघि चाडपर्वमा सामान्य रूपमा तास खेल्ने सर्वसाधारणको नामसमेत सार्वजनिक गर्दै कारबाही गर्ने प्रहरीले क्यासिनोजस्तो संवेदनशील प्रकरणमा किन मौनता अपनायो भन्ने प्रश्न उठेको छ।

यसअघि पनि क्यासिनो सञ्चालनमा प्रशासनिक मिलेमतो हुने गरेको आरोप लाग्दै आएको थियो। क्यासिनोबाट उठ्ने आम्दानीमा प्रशासनिक तहसम्म भागबण्डा हुने गरेको चर्चा नयाँ होइन। जिल्ला प्रहरीको कमजोरी देखिएपछि प्रदेश प्रहरी आफैं छापा हान्नुपर्ने अवस्था सिर्जना भएका घटनाहरू विगतमा समेत देखिएका छन्।

पक्राउ परेकाहरूको विवरण गोप्य राखिँदा निष्पक्ष कारबाही हुन्छ कि हुँदैन भन्ने आशंका थप बलियो बनेको छ। अब प्रहरीले पारदर्शिता देखाउँछ कि यो घटना पनि अन्य जस्तै ओझेलमा पर्छ, त्यो भने हेर्न बाँकी छ।