सुनसरी । इटहरी उपमहानगरपालिका–६ मा मंगलबार बिहान भएको आगलागीले पाँच वटा पसलमा क्षति पुर्याएको छ। बिहान करिब ४ः४५ बजे सेवारो फ्रेस हाउसमा विद्युत् सर्ट भई आगो सुरु भएको हो।
आगो फैलिने क्रममा फ्रेस हाउसमा रहेका तीन वटा ग्यास सिलिन्डर विस्फोट हुँदा अवस्था झनै जटिल बनेको इलाका प्रहरी कार्यालय इटहरीले जनाएको छ। सिलिन्डर पड्किएपछि आगो आसपासका पसलहरूमा तीव्र रूपमा फैलिएको थियो।
आगलागीबाट सेवारो फ्रेस हाउस र खड्का फ्रेस हाउस पूर्ण रूपमा जलेर नष्ट भएका छन्। प्रारम्भिक अनुमान अनुसार सेवारो फ्रेस हाउसमा करिब दुई लाख र खड्का फ्रेस हाउसमा करिब तीन लाख रुपैयाँ बराबरको क्षति भएको छ। खड्का फ्रेस हाउसका दुई वटा सटर र भित्र राखिएको एक थान मोटरसाइकलसमेत जलेर नष्ट भएको प्रहरीले जनाएको छ।
यस्तै नमस्ते फ्रेस हाउस, पूर्वाञ्चल फ्रेस हाउस र गणेश सब्जी पसलमा आंशिक क्षति पुगेको छ। नमस्ते फ्रेस हाउसमा करिब एक लाख १० हजार, गणेश सब्जी पसलमा ८० हजार र पूर्वाञ्चल फ्रेस हाउसमा करिब पाँच हजार रुपैयाँ बराबरको क्षति भएको अनुमान गरिएको छ।
प्रहरी र नेपाली सेनाले समयमै ती पसलका सामानहरू बाहिर निकालेकाले ठूलो क्षति हुनबाट जोगिएको डीएसपी सुवास हमालले जानकारी दिए।
इटहरी उपमहानगरपालिकाको दमकल जेन्जी आन्दोलनका क्रममा जलेर प्रयोगविहीन अवस्थामा रहेकाले धरान, झुम्का र दुहबीबाट आएका दमकलको सहयोगमा आगो नियन्त्रणमा लिइएको थियो। नेपाली सेनाको मेजरको नेतृत्व र डीएसपी हमालको नेतृत्वमा रहेको प्रहरी टोलीले संयुक्त रूपमा करिब दुई घण्टापछि आगो नियन्त्रणमा लिएको हो।
घटनाबारे थप अनुसन्धान भइरहेको प्रहरीले जनाएको छ।
Discussion about this post