इनरुवा । कोशी प्रदेश सरकारमा मन्त्रिपरिषद् हेरफेरको तयारी तीव्र बनेको छ। मुख्यमन्त्री हिक्मत कार्कीले एमाले–कांग्रेस गठबन्धन सरकारअन्तर्गत हाल कार्यरत अधिकांश मन्त्रीहरूलाई फिर्ता बोलाएर नयाँ टिम गठन गर्न लागेका हुन्।
बुधबार साँझसम्म मन्त्रिमण्डल पुनर्गठन गर्ने लक्ष्यसहित मुख्यमन्त्री कार्कीले कांग्रेससँग समन्वय गर्दै मन्त्री फिर्ता बोलाउने प्रक्रिया अघि बढाउन आग्रह गरेका छन्। कांग्रेस संसदीय दलका नेता उद्धव थापा र मुख्यमन्त्रीबीच यस विषयमा सहमति भएको बताइन्छ।
हाल मन्त्रिपरिषद्मा एमालेबाट आन्तरिक मामिला तथा कानुन मन्त्री रेवतीरमण भण्डारी, आर्थिक मामिला तथा योजना मन्त्री राम राना, खानेपानी, ऊर्जा तथा सिँचाइ मन्त्री एकराज कार्की, सामाजिक विकास मन्त्री पाँचकर्ण राई र राज्यमन्त्री सिर्जना राई छन्। कांग्रेसबाट भौतिक पूर्वाधार तथा स्वास्थ्य मन्त्री भूपेन्द्र राई, पर्यटन, वन तथा वातावरण मन्त्री सदानन्द मण्डल र उद्योग, कृषि तथा सहकारी मन्त्री खगेनसिं हांगाम सहभागी छन्।
पुनर्गठित मन्त्रिपरिषद्मा एमालेबाट विदुर लिङथेपलाई आर्थिक मामिला तथा योजना, चिन्तन पाठकलाई खानेपानी, सिँचाइ तथा ऊर्जा, इन्द्रमणि पराजुलीलाई आन्तरिक मामिला तथा कानुन र रामप्रसाद महतोलाई सामाजिक विकास मन्त्रालयको जिम्मेवारी दिने तयारी छ। उमाकान्त गौतम राज्यमन्त्री बन्ने चर्चा पनि छ।
त्यसैगरी कांग्रेसबाट प्रदीप सुनुवार भौतिक पूर्वाधार, भीम पराजुली पर्यटन, वन तथा वातावरण, मानबहादुर लिम्बू स्वास्थ्य मन्त्री बन्ने बताइएको छ। शोभा चेम्जोङलाई राज्यमन्त्री र इस्राइल मन्सुरीलाई उद्योग, कृषि तथा सहकारी मन्त्री बनाइने तयारी रहेको स्रोतको भनाइ छ।
Discussion about this post