इनरुवा । विराटनगरस्थित नोबेल मेडिकल कलेज तथा शिक्षण अस्पतालमा उपचारका लागि आएका बिरामीका आफन्त शल्यक्रियाका लागि आवश्यक औषधि किन्न अस्पतालबाहिरका फार्मेसी धाउँछन् । चिकित्सकको नाम, छाप र हस्ताक्षर भएको पुर्जा बोकेर पुगेका उनीहरू धेरैजसो अवस्थामा नगद अभावका कारण उधारोमै औषधि लिन बाध्य हुन्छन् । यही बाध्यतालाई कमजोरी ठानी केही फार्मेसी सञ्चालकले बिरामीमाथि खुलेआम ठगी गरेको तथ्य बाहिरिएको छ ।
चिकित्सकले सिफारिस गरेका औषधि आफैंमा महँगा हुने गरेका छन् । तर फार्मेसी सञ्चालकले त्यसमा पनि बद्मासी गर्दै पुर्जामा लेखिएको औषधिको संख्यामा ‘अंक थप्ने’ गरेको प्रमाण फेला परेको छ । चिकित्सकले एक थान लेखिदिएको औषधिलाई दुई, तीन मात्र होइन—पाँच र आठसम्म पुर्याएर रकम असुलिएको देखिएको हो ।
घटनाको क्रममा ६४० रुपैयाँ पर्ने ‘रेक्युमिड–१’ लेखिएको पुर्जामा पछाडि ‘५’ थपिएको भेटिएको छ । यस्तै, ‘डेस्टिमिड–१’ लेखिएको स्थानमा ‘८’ थपिएको प्रमाण पनि सार्वजनिक भएको छ । प्रतिथान १ हजार २०८ रुपैयाँ पर्ने उक्त औषधिको संख्यामा गरिएको यो हेरफेरले बिरामी पक्षबाट हजारौं रुपैयाँ अतिरिक्त असुली भएको अनुमान गरिएको छ ।
फार्मेसीले चिकित्सकको पुर्जा लिएर फोटो कपी गर्ने र त्यही फोटो कपी आफ्नै नियन्त्रणमा राख्ने गरेको पनि खुल्न आएको छ । यही प्रक्रियाबाट पुर्जामा पछि अंक थपेर हिसाब मिलाउने गरिएको बताइएको छ ।
यो ठगी प्रकरण बाहिरिएपछि नोबेल अस्पताल प्रशासनसमेत अचम्मित बनेको छ । अस्पतालका महाप्रबन्धक दिपेश राईका अनुसार पीडित बिरामीका आफन्त अलिक पढेलेखेका भएकाले चिकित्सकको मूल पुर्जा र फार्मेसीले दिएको विवरण तुलना गर्दा ठगी पत्ता लागेको हो । “नत्र हतार र तनावको अवस्थामा झोलामा कति औषधि पर्यो भन्ने धेरैले हेर्दैनन्,” राईले बताए ।
घटनापछि अस्पताल प्रशासनले अस्पताल वरपर सञ्चालित फार्मेसीहरूसँग छलफलसमेत गरेको जनाएको छ । तर ठगी गरेको आरोप लागेको फार्मेसीका सञ्चालक भने छलफलमा नआएको अस्पतालको भनाइ छ । घटना सार्वजनिक भएपछि सम्बन्धित फार्मेसीका सञ्चालक सटर बन्द गरेर फरार भएको बताइएको छ ।
हातले लेखिने पुर्जाका कारण यस्ता ठगी हुने गरेको निष्कर्ष निकाल्दै नोबेल अस्पतालले अब कम्प्युटराइज्ड डिजिटल प्रणाली लागू गर्ने तयारी थालेको जनाएको छ । साथै, सेवाग्राहीलाई औषधि जुनसुकै फार्मेसीबाट किने पनि चिकित्सकले सिफारिस गरेको विवरण र खरिद गरिएको औषधि अनिवार्य रूपमा मिलान गर्न अनुरोध गरिएको छ । अस्पतालका आधिकारिक कागजात सुरक्षित राखी अन्तिममा फार्मेसीको बिलसँग हिसाब मिलाउन पनि आग्रह गरिएको छ ।
यस विषयमा सम्बन्धित फार्मेसी सञ्चालकसँग प्रतिक्रिया लिन खोज्दा सम्पर्क हुन सकेन । सटर बन्द गरेर फरार भएपछि उनीहरूको भनाइ सार्वजनिक हुन सकेको छैन ।
Discussion about this post