सुनसरी । निर्वाचनको मिति नजिकिँदै जाँदा सुरक्षा व्यवस्था कडा पार्दै नेपाल प्रहरीले देशभर अतिरिक्त जनशक्ति परिचालन सुरु गरेको छ। सुरक्षा संवेदनशीलताको विश्लेषणका आधारमा तराईका जिल्लामा ४४ डिएसपी र ११० इन्स्पेक्टर खटाइएको प्रहरी प्रधान कार्यालयले जनाएको छ।
काठमाडौं उपत्यकाभित्र कार्यरत प्रहरी अधिकृतहरूलाई अप्रेसन कमान्डरका रूपमा विभिन्न जिल्लामा पठाइएको हो। उनीहरूले आइतबारदेखि तोकिएको क्षेत्रमा जिम्मेवारी सम्हाल्नेछन्। प्रहरी प्रवक्ता डिआइजी अविनारायण काफ्लेका अनुसार तराईका जिल्लामा सुरक्षा चुनौती तुलनात्मक रूपमा बढी भएकाले थप जनशक्ति परिचालन गरिएको हो। “सुरक्षाको दृष्टिकोणले तराईका जिल्ला संवेदनशील छन्। त्यसैले जोखिम विश्लेषण गरेर अतिरिक्त अधिकृत खटाइएको हो,” उनले बताए। सकेसम्म प्रत्येक पालिकामा दुई जना इन्स्पेक्टर रहने गरी व्यवस्थापन मिलाइएको जनाइएको छ।
विगतका निर्वाचनमा तराई क्षेत्रमा देखिएका चुनौतीबाट पाठ सिक्दै यसपटक उच्च संवेदनशील मतदानस्थलमा वरिष्ठ प्रहरी अधिकारी केन्द्रित गरिने भएको छ। ती जिल्लामा मतदाता र मतदान केन्द्रको संख्या पनि धेरै रहेकोले सुरक्षा प्रबन्ध मजबुत पारिएको हो।
पहाडी तथा हिमाली जिल्लामा भने हालको जनशक्ति पर्याप्त रहेको प्रहरी प्रधान कार्यालयको दाबी छ। यद्यपि, केही जिल्लामा आवश्यकताअनुसार थप सुरक्षाकर्मी खटाउने तयारी गरिएको छ।
उपत्यकाबाट १३ हजार जनशक्ति बाहिर
प्रहरी प्रधान कार्यालय तथा उपत्यकाअन्तर्गतका विभिन्न इकाइमा कार्यरत करिब १३ हजार प्रहरी कर्मचारीलाई उपत्यकाबाहिरका जिल्लामा पठाउने तयारी छ। फागुनको दोस्रो सातादेखि उनीहरूलाई खटाइनेछ। काठमाडौं उपत्यकाका तीनै जिल्लामा निर्वाचनका लागि पर्याप्त सुरक्षा व्यवस्था रहेकाले अतिरिक्त जनशक्ति अन्य जिल्लामा परिचालन गर्न लागिएको हो। केही संवेदनशील जिल्लामा एसएसपीसमेत खटाइने तयारी छ।
निर्वाचन सुरक्षाका लागि नेपाल प्रहरीले एक लाख ३३ हजार ९८० जना निर्वाचन प्रहरी भर्ना गरिसकेको छ। प्रहरीलाई सहयोग गर्न नेपाली सेना पनि २१ माघदेखि ब्यारेकबाट बाहिरिसकेको छ। सेनाले कारागार, विमानस्थललगायत महत्वपूर्ण संरचनाको सुरक्षा जिम्मा लिएको छ।
निर्वाचन विश्लेषण महाशाखा स्थापना
निर्वाचनविरोधी गतिविधि निगरानी गर्न प्रहरी प्रधान कार्यालयले ‘निर्वाचन विश्लेषण महाशाखा’ स्थापना गरेको छ। एसएसपीको कमान्डमा सञ्चालन हुने उक्त महाशाखालाई निर्वाचन बिथोल्न सक्रिय समूहको गतिविधि अनुगमन तथा विश्लेषण गरी आवश्यक सुरक्षा रणनीति तयार गर्ने जिम्मेवारी दिइएको छ।
प्रहरी स्रोतका अनुसार केही व्यक्ति तथा साना समूह निर्वाचनविरोधी गतिविधिमा सक्रिय देखिएका छन्। यस्ता गतिविधिमाथि कडा निगरानी राखिएको र आवश्यक परे कानुनी कारबाही गरिने जनाइएको छ।
निर्वाचनलाई शान्तिपूर्ण, सुरक्षित र निष्पक्ष रूपमा सम्पन्न गराउन सुरक्षा निकायले बहुस्तरीय तयारी तीव्र बनाएको जनाएको छ।
Discussion about this post