दरबन्दी अनुसारको डाक्टरको व्यवस्था मिलाउन माग

इनरुवा । सुनसरीको सदरमुकाम इनरुवामा अस्पताल सुधारका लागि बृहत अन्तरक्रिया कार्यक्रम सम्पन्न भएको छ ।
अन्तरक्रिया कार्यक्रममा जिल्ला अस्पतालमा ११ जना चिकित्सकको दरबन्दी भएपनि दुई जना मात्रै डाक्टर रहेको भन्दै स्थानीयहरुले दरबन्दी अनुासरको चिकित्सकको व्यवस्था मिलाउन माग गरेका थिए । चिकित्सक अभावमा जिल्ला इनरुवा अस्पतालले नागरिकलाई प्रभावकारी रुपमा सेवा प्रवाह गर्न नसकेको भन्दै दरबन्दी अनुसारको डाक्टरको व्यवस्था मिलाउन अस्पताल सुधार संर्घष समितिले माग गरेका हुन् ।
इनरुवा अस्पताल सुधारका लागि इनरुवा अस्पताल सुधार संर्घष समितिले शनिबार आयोजना गरेको बृहत अन्तरक्रिया कार्यक्रममा सहभागीहरुले ११ जना चिकित्सक सहित ५९ जनाको दरबन्दी भएको अस्पतालमा २८ जना मात्रै कर्मचारी रहेकोले सो माग गरेका हुन् ।
इनरुवा अस्पतालले इनरुवा नगरपालिकाका साथै भोक्राहा नरसिंह, हरिनगर गाउँपालिका, कोशी गाउँपालिका, गढी गाउँपालिका लगायतका क्षेत्रका बिरामीलाई सेवा प्रदान गर्दै आएको भएपनि बिशेषज्ञ चिकित्सकको अभाव र अस्पतालमा बढेको अनियमितताका कारण जनताहरुले सहज रुपमा प्रभावकारी स्वास्थ्य सेवा पाउन नसकेको उनिहरुले गुनासो गरेका हुन् । इनरुवा अस्पतालमा दैनिक रुपमा बिरामीको चाप अत्यधिक हुने गरेपनि अस्पतालमा लामो समयदेखि चिकित्सक अभाव रहेकोले सेवाग्राहीले निकै सास्ती बेहोनुपरेको इनरुवा अस्पताल सुधार संर्घष समितिका संयोजक दिलिपचन साहले बताए ।

उनले अस्पतालमा राजनिति हावी भएको कारण अस्पतालको प्रशासनदेखि लिएर आर्थिक तथा व्यवस्थापकीय क्षेत्र लथालिंग बनेको बताए ।
इनरुवा अस्पतालमा दरबन्दी अनुसारको दक्ष चिकित्सक र जनशक्ति अभावलाई पूर्तिका गर्नका लागि अस्पताल व्यवस्थान समिति, प्रदेश सरकार र स्थानीय सरकार उदासिन बनेकोले जनताले स्वास्थ्य उपचारका लागि धरान–बिराटनगर पुग्नुपर्ने बाध्यता रहेको उनले बताए ।
कार्यक्रममा बोल्दै इनरुवा अस्पतालका पूर्व डाक्टर बालकृष्ण साहले अस्पतालमा देखिएको समस्यालाई उचित व्यवस्थापन गर्दै अगाडि बढ्नुपर्ने आवश्यकता रहेको बताए ।
नागरिकको स्वास्थ्य जस्तो संवेदनशील विषयमा अस्पताल व्यवस्थापन समिति र स्थानीयबासीहरु गम्भीर बन्नुपर्नेमा जोड दिए । इनरुवा अस्पतालबाट नागरिकले कसरी चौबीसै घन्टा सहज, सुलभ, छिटो र गुणस्तरीय सेवा पाउँछन् भन्ने विषयमा सबैको ध्यान केन्द्रित हुन जरुरी रहेको उद्योग बाणिज्य संघ इनरुवाका अध्यक्ष बीरेन्द्रकुमार साहले बताए ।