सुनसरीमा उत्कृष्ट कार्यसम्पादन भएको प्रहरी उपरीक्षक सञ्जयसिंह थापाकाे दाबी

इनरुवा । जिल्ला प्रहरी कार्यालय सुनसरीको प्रहरी उपरीक्षक सञ्जयसिंह थापाकाे नेतृत्वले आफ्नो कार्यकालमा उत्कृष्ट कार्यसम्पादन भएको बताए ।
आज आयाेजित पत्रकार भेटघाट तथा छलफल कार्यक्रममा प्रहरी उपरीक्षक थापाले १ करोड ४५ लाख ३२ हजार १ सय १ रूपैयाँ जरिवाना उसुल उपर गरिएको जानकारी दिए ।
प्रहरी उपरीक्षक थापा जिल्ला प्रहरी कार्यालय सुनसरीमा आफ्नो कार्यकाल अबधिमा विवाद रहित उत्कृष्ट कार्यसम्पादन गर्न सफल भएका हुन् ।
उता प्रहरी उपरीक्षक थापाले आफ्नो कार्यकालमा भएका उल्लेखनीय कामहरूको चर्चा गर्दै प्रहरी साथीहरूलाई प्राथमिकतामा राखेर काम गरेको, अपराध अनुसन्धान लगायत फरार अभियुक्त पक्राउ गरेर कार्वाही गरेको एवम् लागूऔषध विरूद्धको अभियानलाई तीव्र पारेर धेरै हदसम्म नियन्त्रण गर्न सफल भएको बताए । उनले जिल्लामा शान्ति सुरक्षालाई मजबुत बनाएर अपराध नियन्त्रण एवं अनुसन्धानमा र आफ्नो कार्यकालमा कोही कसैले पनि प्रहरीमाथि प्रश्न गर्ने वातावरण बन्न नदिएको बताए ।
कार्यक्रममा थापाले आफ्नो कार्यकालका गरेका प्रमुख उपलब्धीहरू सहितको कार्य प्रगती विवरण प्रस्तुतीकरण गरेका थिए । कार्यसम्पादन सम्झौता तथा अनुगमन प्रणाली कार्यान्वयन, नीतिगत सुधार तथा कार्यक्रमहरू, भवन निर्माण तथा उद्घाटन, तालिम, अन्वेषणमा आधारित योजना निर्माण र कार्यान्वयन प्रणाली कार्यान्वयन, अपराध नियन्त्रण तथा अनुसन्धान, समुदाय-प्रहरी साझेदारी कार्यक्रम, कोरोना रोकथाम तथा नियन्त्रण, तपाईको मास्क खोइ ?, वैदेशिक सहायता, कल्याणकारी कार्यक्रमबारे विश्लेषण सहित जानकारी दिए ।
जिल्लामा हुने सम्भावित अबैध कार्यलाई पूर्ण रुपमा रोक्न सफल भएको दाबी गरे । जिल्लाभित्र हुने गरेको गुण्डागर्दी लगायतका समस्याहरुलाई पूर्ण रुपमा रोक्न र जिल्लाको दक्षिणी क्षेत्रमा हुने गरेको तस्करीलाई हदैसम्म रोक्न सफल भएको बताए । कार्यक्रममा प्रहरी उपरीक्षक थापा र उपस्थित सञ्चारकर्मीहरू बीच समसामयिक बिषयमा छलफल तथा अन्तरक्रिया समेत भएको थियो । भने उनकाे सरूवा केन्द्रीय अनुसन्धान ब्यूरो सीआईबीमा भएकाे छ ।