साउदी अरबमा मृतक नेपाली श्रमिकका परिवारलाई १४ वर्षपछि GOSI रकम: सुनसरीका ८ जनाको जीवनमा राहत

दिपेन्द्र यादव/सुनसरी – साउदी अरबमा कार्यरत नेपाली श्रमिकहरूको सामाजिक सुरक्षा बीमा (GOSI) रकम प्राप्त गर्ने प्रक्रिया पुनः सुरु भएको छ। उक्त प्रक्रिया अन्तर्गत, १४ वर्षअघि साउदी अरबमा कार्य दुर्घटनामा मृतक भएका नेपाली श्रमिकका परिवारलाई GOSI रकम प्राप्त गर्ने अवसर प्रदान गरिएको छ। साउदी अरबमा केही वर्ष अघि मृत्युु भएका सुनसरीका ८ जनाका परिवारका लागि तत्काल सामाजिक सुरक्षा बीमा (GOSI) रकम आउने भएपछि उनीहरूकाे परिवारमा केही राहत र आशाको किरण पलाएको छ।सुनसरीको इनरुवा स्थित सुरक्षित आप्रवासन केन्द्रका परामर्शदाता सुमन राय र अनुप्रिया स्वर्णकारले GOSI रकम प्राप्ति प्रक्रिया अन्तिम चरणमा पुगेको जानकारी दिएका छन्। उनीहरूले बताएअनुसार नेपाल सरकार र साउदी अरबस्थित दूतावासको सक्रिय समन्वयका कारण १४ वर्षअघि साउदी अरबमा कार्य दुर्घटनामा मृतक भएका नेपाली श्रमिकका परिवारलाई अब GOSI रकम प्राप्त हुने बताए ।
सुरक्षित आप्रवासन केन्द्रका परामर्शदाता सुमन रायले भने, “यो प्रक्रिया केही समयको लागि ढिला भएको थियो, तर अहिले सामाजिक सुरक्षा रकम प्राप्ति प्रक्रिया पुनः सक्रिय भएको छ। यसका लागि हकवाला व्यक्तिहरूलाई समयमै कागजातहरू तयार राख्न र सम्बन्धित निकायसँग समन्वय गर्न महत्त्वपूर्ण भूमिका निभाउनुपर्ने छ।”
त्यसैगरी परामर्शदाता अनुप्रिया स्वर्णकारले भने, “GOSI रकम प्राप्त गर्नका लागि सबै कागजात समयमै बुझाउनु अत्यन्त आवश्यक छ। हाल, सुनसरीका केही परिवारहरूले कागजात तयार पार्न र दूतावाससँग समन्वय गर्न सकेको खण्डमा, उनीहरूको रकम प्राप्त गर्ने संभावना उच्च रहेको बताइन् ।”
यता साे प्रक्रिया अन्तर्गत, हरिनगर गाउँपालिकाका बद्री सरबरिया (मण्डल), नजाम अंसारी, धरान उपमहानगरपालिकाका केशव चौधरी, जनक चौधरी, दुहबी नगरपालिकाका इद्रिश मियाँ, रामधुनी नगरपालिकाका बुधनारायण चौधरी, र राजिन चौधरीले अब GOSI रकम प्राप्त गर्नेछन्। भुक्तानी प्रक्रिया अन्तिम चरणमा पुगेको र आप्रवासी स्रोत केन्द्र सुनसरी इनरुवाले जानकारी दिएको छ।
उता साउदी अरबमा कार्यरत नेपाली श्रमिकहरूको वैदेशिक रोजगारको यात्रामा न केवल कठिनाइहरूको सामना गर्नु पर्छ, तर कहिलेकाहीं अत्यन्तै दुःखद घटनाहरू पनि घट्छन्। यस्तै, १४ वर्षअघि कार्य दुर्घटनामा मृतक भएका श्रमिकहरूको परिवारलाई GOSI रकम प्राप्त गर्नका लागि यो प्रक्रिया अझ महत्त्वपूर्ण छ। यससँगै, वैदेशिक रोजगारमा जाँदा उत्पन्न हुने जोखिम र दुर्घटनाहरूको मर्मस्पर्शी वास्तविकता पुनः उजागर भएको छ।
नेपाली श्रमिकहरू प्रायः साउदी अरबजस्ता देशहरूमा कठिन परिस्थितिमा काम गर्दै आएका छन्, जहाँ उनीहरूको सुरक्षा र कामकाजी अवस्था प्रायः चुनौतीपूर्ण हुन्छ। विगतका वर्षहरूमा दुर्घटनामा परेका श्रमिकहरूको परिवारलाई उचित मुआब्जा र सामाजिक सुरक्षा रकम प्राप्ति प्रक्रिया निकै लामो र जटिल भएको थियो, जसका कारण कतिपय परिवारहरूले आर्थिक समस्यामा पर्दै आएका थिए।सुरक्षा उपायहरूको अभाव र कामका दौरानको उच्च जोखिमका कारण नेपाली श्रमिकहरूले दैनिक जीवनमा कठिनाइहरूको सामना गर्नुपरेको छ। उदाहरणका लागि, साउदी अरबमा एक नेपाली कामदारको मृत्युलाई लिएर १४ वर्षपछि उनको परिवारलाई GOSI रकमको प्रक्रिया थालिएको छ। यस प्रकारका घटनाले वैदेशिक श्रम प्रवाह र श्रमिक सुरक्षा नीति सुधारको महत्त्वलाई पुनः औंल्याउँछ।
यता नेपाल सरकार र साउदी अरबको दूतावासले समय-समयमा गम्भीर घटनाहरूको समाधानका लागि महत्त्वपूर्ण कदम उठाएका छन्। उक्त प्रक्रियामा शीघ्र कागजात व्यवस्थापन र समन्वयका लागि दूतावासले सम्बन्धित परिवारसँग सम्पर्क गर्न अनुरोध गरेको छ। साउदी अरबमा कार्य दुर्घटनामा घाइते वा मृतक भएका नेपाली श्रमिकका परिवारलाई आर्थिक राहत पुर्याउने उद्देश्यले हालसम्म ४५० वटा केसहरूमध्ये २३६ वटा केस स्वीकृत भइसकेका छन्।
त्यसैगरी नेपाल सरकारले यो प्रक्रिया मार्फत वैदेशिक श्रमिकहरूको कल्याण र सुरक्षा सुनिश्चित गर्ने आफ्नो निरन्तर प्रयासलाई अझ प्रभावकारी बनाउन काम गरिरहेको छ। GOSI रकम जस्ता सामाजिक सुरक्षा योजनाहरूको कार्यान्वयनले नेपाली श्रमिकहरूको जीवनस्तर सुधार्न र उनीहरूको परिवारलाई आर्थिक सहयोग पुर्याउने भएका छन् ।