मोरङ र सुनसरी: गाँजाको ‘ट्रान्जिट पोइन्ट’

इनरुवा । काेशी प्रदेश स्थित मोरङ र सुनसरीका सीमावर्ती क्षेत्र गाँजा तस्करीका लागि ट्रान्जिट पोइन्टको रूपमा विकसित हुँदै गइरहेका छन्। प्रहरीको सक्रियताका बावजुद गाँजा तस्करीको शृंखला भने रोकिएको छैन्।

यता मंगलबार मोरङ प्रहरीले भारत तस्करीको तयारीमा रहेको १५५ केजी गाँजा बोकेको स्कारपियो र दुई व्यक्तिलाई पक्राउ गरेको छ। पक्राउ पर्नेमा धरान–१२ का २४ वर्षीय राहुल बिश्वकर्मा र धनकुटा सहिदभूमि गाउँपालिका–६ का १९ वर्षीय सुरज राई रहेका छन्। राहुल चालक हुन् भने सुरज स्कारपियोमा सवार थिए।

यसअघि, सशस्त्र प्रहरी बल सुनसरीले भोक्राहा नरसिंह गाउँपालिका क्षेत्रबाट १४८ केजी गाँजा बरामद गरेको थियो। तस्करीमा संलग्न गिरोहले सडेको तरकारीका बीचमा गाँजा लुकाएर तस्करी गर्न खोजेको पाइएको थियो।

त्यसैगरी धनकुटा, भोजपुर, र उदयपुरबाट उत्पादन हुने गाँजालाई तस्करी गर्न गाडी प्रयोग गर्ने प्रवृत्ति बढ्दै गएको छ। खुला सीमाको फाइदा उठाउँदै तस्करहरूले नेपाल–भारत सीमाबाट गाँजा भारततिर पठाउने क्रम जारी छ। भारतमा गाँजाको मूल्य प्रतिकिलो १५–२० हजार रुपैयाँसम्म पर्ने भएकाले यो तस्करी आर्थिक रूपमा अत्यधिक लाभदायक मानिन्छ।

यता सुनसरी र मोरङका प्रहरी प्रमुखहरूका अनुसार गाँजा तस्करी नियन्त्रणमा चुनौतीपूर्ण बनेको छ। कोशी प्रदेश प्रहरी कार्यालयका डीआईजी राजन अधिकारीका अनुसार, भारतीय तस्करहरू नेपाली भूमिमा खेती गर्न र नेपाली नागरिकलाई भरिया बनाउन सक्रिय छन्।

उनका अनुसार, किसानहरूले थोरै रकम पाएर खेत भाडामा दिन तयार हुने र गरिबीका कारण युवा कामदार भरियाको रूपमा प्रयोग हुने गरेका छन्। यो सञ्जाललाई जडदेखि उखेल्न कठिन भएको प्रहरीको ठम्याइ छ।

त्यस्तै मोरङ प्रहरीका प्रवक्ता डिएसपी वेदप्रकाश जोशीका अनुसार, गोप्य सूचनाका आधारमा निगरानी बढाएर ठूलो परिमाणमा गाँजा नियन्त्रणमा लिन सफल भएको छ। तर, तस्करहरूले नयाँ–नयाँ तरिका अपनाउँदै आएका कारण यसलाई पूर्ण रूपमा रोक्न कठिन भइरहेको छ।

डीआईजी अधिकारीका अनुसार, गाँजालाई प्रशोधन गरी चरेस र औषधिमा समेत प्रयोग हुने भएकाले यसको माग उच्च छ। बारीमा प्रतिकिलो २,५००–४,००० रुपैयाँ पर्ने गाँजा भारत पुग्दा ३०,००० रुपैयाँभन्दा महँगोमा बिक्री हुने गरेको छ।