जनकपुरधाम – धनुषाको विदेह नगरपालिकामा प्रमुख प्रशासकीय अधिकृत दीपेन्द्र कुमार साहलाई कार्यरत कर्मचारीहरूले लखेटेका छन्। आइतबार दलबलसहित कार्यालय प्रवेश गर्न खोजेपछि कर्मचारीहरूले उनलाई गेट नपुग्दै रोक लगाउँदै लखेटेका हुन्।
नगरपालिकाका नगर प्रमुख बेचन दाससँग लामो समयदेखि विवाद रहेका अधिकृत साहलाई कार्यालय प्रवेशमा अवरोध गरिएको हो। कर्मचारीहरू ‘ईन्जिनीयर दीपेन्द्र कुमार साह फिर्ता जाऊ’, ‘भ्रष्ट हाकिम दीपेन्द्र साह फिर्ता जाऊ’ भन्ने नारासहित उनको विरोधमा उत्रिएका थिए।
कर्मचारीको तीव्र विरोधका बाबजुद प्रमुख प्रशासकीय अधिकृत साह मोटो सुरक्षाबीच कार्यालय छिर्ने प्रयास गर्दै नेता शैलीमा हात हल्लाउँदै अघि बढेका थिए। तर, कर्मचारीहरूले उनलाई अवरोध गरेपछि सुरक्षाकर्मीको सहयोगमा उनी कार्यालयबाट बाहिरिन बाध्य भएका छन्।
नगर प्रमुख दाससँगको विवादपछि कार्यालयमा कार्यरत कर्मचारीहरू समेत नगर प्रमुखको समर्थनमा उभिएका छन्। कर्मचारीहरूले अधिकृत साहको कार्यशैलीप्रति असन्तुष्टि जनाउँदै उनको कार्यकाल विवादास्पद रहेको आरोप लगाएका छन्।
नगर प्रमुख बेचन दास र प्रमुख प्रशासकीय अधिकृत साहबीच विभिन्न विकास आयोजनाको बजेट तथा प्रशासनिक निर्णयहरूलाई लिएर विवाद रहँदै आएको थियो। नगरपालिकाका स्रोतका अनुसार अधिकृत साहले नगर प्रमुखलाई बाइपास गर्दै कर्मचारी तथा अन्य निकायहरूसँग सम्पर्क बढाउँदै आएका थिए, जसले नगरपालिकाभित्र असहज वातावरण सिर्जना गरेको थियो।
नगर प्रमुखलाई कमजोर बनाउने उद्देश्यले अधिकृत साहले विभिन्न नीतिगत निर्णयहरूमा अवरोध गर्दै आएका कारण कर्मचारीहरू उनको विरुद्ध उभिन पुगेका हुन्। कार्यालयमा उनले कर्मचारीहरूलाई अनावश्यक दबाब दिने, दुव्र्यवहार गर्ने र मनोमानी निर्णय लाद्ने गरेको आरोप कर्मचारीहरूले लगाएका छन्।
नगरपालिकाका कर्मचारीहरूले प्रमुख प्रशासकीय अधिकृत साहको बहिर्गमनको माग गर्दै नाराबाजी गरेका थिए। उनीहरूले उनको नियुक्ति फिर्ता नलिए आन्दोलन चर्काउने चेतावनी दिएका छन्।
एक कर्मचारीले नाम नखुलाउने शर्तमा भने, “साहले नगरपालिकालाई व्यक्तिगत स्वार्थको केन्द्र बनाएका छन्। हामी नगरपालिकामा राम्रो वातावरण चाहन्छौं, उनी फर्केर आउनु हुँदैन।”
यता, प्रमुख प्रशासकीय अधिकृत साहले भने आफूमाथि लागेको आरोप निराधार रहेको दाबी गरेका छन्। उनले नगरपालिकामा आर्थिक अनुशासन कायम गर्ने क्रममा आफूलाई योजनाबद्ध रूपमा फसाइएको दाबी गरेका छन्।
फिल्मी शैलीमा बाहिरिएका साह
कार्यालय प्रवेशमा असफल भएपछि अधिकृत साह जमिनमा टाउको ढोगेर फर्किएका थिए। उनका सहयोगीहरूले घटनालाई सामान्य बनाउने प्रयास गरे पनि कर्मचारीहरूको आक्रोश साम्य हुन सकेन।
नगर प्रमुख दासले भने यो घटनाबारे विस्तृत जानकारी गराइने बताउँदै नगरपालिकाभित्रको असन्तुष्टि समाधान गर्न प्रयास गरिने बताए। तर, उनले कर्मचारीहरूको भावना विपरीत कुनै निर्णय नगरिने स्पष्ट पारे।
यस घटनाले विदेह नगरपालिकाको प्रशासनिक अवस्था थप जटिल बनाएको छ। यदि प्रमुख प्रशासकीय अधिकृत साहले पुनः कार्यालय प्रवेश गर्न खोजे भने कर्मचारीहरूले थप आन्दोलन चर्काउने संकेत गरेका छन्।
नगरपालिकाभित्र देखिएको यो संकट समाधान गर्न प्रदेश सरकार र अन्य सम्बन्धित निकायहरूको पहल आवश्यक देखिएको छ।
Discussion about this post