इनरुवा । सुनसरीका नयाँ प्रहरी प्रमुख (एसपी) केशव कुमार थेबे जिल्लामा औपचारिक परिचय कार्यक्रममा संचारकर्मीहरूसँग भेट्दा सबैभन्दा बढी उठेको प्रश्न घुमुवा प्रहरी सम्बन्धमा थियो। सञ्चारकर्मीले आरोप लगाएका छन् ।
“तपाईँकै घुमुवा प्रहरी तस्करीका सामान स्कटिङ गर्छन्, मासिक/हप्तावारी पैसा असुल्छन्। कारबाही गर्न सक्नुहुन्छ ?”
जवाफमा एसपी थेबेले भने,
“मैले मातहतका इन्चार्जहरुलाई चोरी–तस्करीदेखि लागुऔषधसम्म निर्मम भएर रोक्न निर्देशन दिएको छु। यदि मेरो प्रहरी संलग्न देखियो भने प्रमाणसहित जानकारी दिनुहोस्, हदैसम्मको कारबाही गर्छु।”
तर सञ्चारकर्मीले फेरि सोध्दा उनको जवाफ अझै सामान्य सुनियो— “हिजो के भयो सरोकार छैन, आजबाट प्रहरीको गतिविधि हेर्नुहोस्।”
घुमुवा प्रहरीबारे आलोचना
सञ्चारकर्मीले लगातार उठाएका प्रश्नपछि एसपीले घुमुवा प्रहरीको बचाउ गरेको जस्तो देखियो।
- हाल घुमुवा टोली प्रहरी हबलदार सालिकराम राजवंशीक नेतृत्वमा ६ जनाको समूह रहेको छ।
- यी प्रहरीमाथि तस्करहरूसँग साठगाठ गरेर पैसा असुल्ने गम्भीर आरोप लागेको छ।
- स्थानीय व्यापारीको दाबीअनुसार, “घुमुवाको कल डिटेल मात्र हेरे पुग्छ, शतप्रतिशत संलग्नता प्रमाणित हुन्छ।”
इन्चार्जलाई ‘निर्मम’ निर्देशन, घुमुवालाई ‘नर्मल’
नयाँ एसपीले सीमा नाकाका इन्चार्जहरुलाई ‘सेटिङजन्य काम पूर्ण रूपमा रोक्न’ आदेश दिएका छन्। यसले धेरै इन्चार्ज असन्तुष्ट भएको प्रहरी वृत्तान्त छ।
तर अर्कोतर्फ घुमुवा टोलीलाई भने सामान्य निर्देशन मात्र दिएको आरोप छ। यसले प्रहरीभित्रै प्रश्न उठाएको छ— “इन्चार्जलाई कडा, घुमुवालाई नरम किन ?”
सुनसरी एसपीको पद र विवाद
सुनसरी भारतसँग ६२ किलोमिटर सीमा जोडिएको संवेदनशील जिल्ला भएकाले यहाँको एसपी पद सधैं चर्चामा रहन्छ।
- विगतमा पनि नयाँ एसपी आउँदा सुरुमा नाका टाइट गर्ने, पछि ‘सेटिङ’ मिलाएर तस्करी खुलाउने चलन रहेको स्थानीय अनुभव छ।
- यसअघि आएका एसपी सुमन तिम्सिनाले सरुवा हुनु अघि आफ्ना नजिकका प्रहरीलाई सीमामा राखेका थिए। अहिलेका एसपी थेबेले उनीहरुप्रति ‘निर्मम’ व्यवहार देखाएको चर्चा छ।
थेबेप्रतिको अपेक्षा र चुनौती
एसपी केशव थेबे अपराध अनुसन्धानमा दक्ष मानिने प्रहरी अधिकृत हुन्। उनी हालका प्रहरी महानिरीक्षक (आइजिपी) चन्द्र कुबेर खापुङसँग निकट भएकाले नै सुनसरीमा पठाइएको चर्चा छ।
तर उनको नेतृत्वमा सीमा तस्करी कसरी नियन्त्रण हुन्छ भन्ने विषयमा अझै प्रश्न उब्जिएको छ।
- दसैँ–तिहार नजिकिँदै गर्दा तस्करी सक्रिय हुने समय हो।
- अर्कोतर्फ, हाल जेनजी युवाहरूले पनि तस्करीविरुद्ध प्रत्यक्ष प्रतिवाद थालेका छन्।
- भदौ २९ मा मात्रै जेनजी युवाले इटहरीमा ६ हजार किलो गाँजा बोकेको ट्रक नियन्त्रणमा लिएर सशस्त्र प्रहरीलाई बुझाएका थिए।
यता नयाँ एसपी थेबेले इन्चार्जलाई कडाई गर्ने आदेश दिए पनि विवादास्पद घुमुवा प्रहरीप्रति नरम व्यवहार देखाएको आरोप लगाइएको छ। तस्करी नियन्त्रण गर्ने वा पुरानै ‘सेटिङ संस्कृतिलाई’ निरन्तरता दिने भन्ने प्रश्न अबको कार्यकालमा मात्र स्पष्ट हुनेछ।
Discussion about this post