रन्धिर यादव/सुनसरी। आस्थाको महान पर्व छठको तेस्रो दिन आज साँझ सुनसरीका विभिन्न छठघाटहरूमा अस्ताउँदो सूर्यलाई अर्घ प्रदान गर्दै पूजा–अर्चना गरिँदैछ। सूर्य भगवान् र छठी माईको आराधनामा मनाइने यस पर्वमा व्रतधारीहरूले निष्ठा, संयम र पवित्रताका साथ जलाशय किनारमा सामूहिक प्रार्थना गर्ने तयारी तीव्र भएको छ।
सुनसरीमा कोशी ब्यारेज, सुनसरी खोलाको तट, शंकरपुर शाखा नहर, सुकसेना शाखा नहर, गडन खोलाको किनार, झुम्का बजारछेउका पोखरी–नहर, दुहबी–हुलाकी सडक छेउका छठघाट, भोक्राहा नरसिंह गाउँपालिका, हरिनगर, कोशी गाउँपालिका, इटहरी, इनरुवा, दुहबी, बरहान–भण्टाबारी लगायत स्थानहरूमा छठघाटहरू सजाइएका छन्। स्थानीय समुदाय, युवा समूह, वडा कार्यालय र पालिका प्रशासनको सक्रिय सहभागितामा घाट सरसफाइ र सुरक्षा व्यवस्था गरिएको छ।
व्रतधारीहरू बाँसको सुपामा ठकुवा, भुसुवा, केरालगायत प्रसाद राखेर आज साँझ अस्ताउँदै गरेको सूर्यलाई अर्घ दिनेछन्। छठ भजन, भक्तिगीत, मद्धुर लोकधुन र पारम्परिक वाद्यवादनसहित घाटहरूमा सांस्कृतिक माहोल व्यापक देखिएको छ।
स्थानीय बासिन्दा रामबाबु यादव भन्छन्, “यो केही दिनको पूजा मात्र होइन, वर्षभरको पवित्रता, विश्वास र परिवारको सुख–समृद्धिको कामना हो। घाटमा सबैका हातमा सुपा, हृदयमा आस्था र आवाजमा श्रद्धा हुन्छ।”
यस्तै, झुम्का बजारमा भेटिएकी व्रती सुनिता झा भन्छिन्, “छठमा अनुशासन र शुद्धता मुख्य हो। दुख परे पनि निष्ठाले व्रत बसिन्छ, किनकि छठी माईले चित्तका इच्छा पूरा गरिदिनुहुन्छ भन्ने विश्वास छ।”
भोलि बिहान सबेरै उदाउँदै गरेको सूर्यलाई अर्घ दिएपछि छठ पर्वको औपचारिक समापन हुनेछ। त्यसपछि व्रतीहरूले घर फर्की प्रसाद ग्रहण गरी व्रत पारण गर्नेछन्।
यता नेपाल प्रहरी, सशस्त्र प्रहरी, स्थानीय तहका प्रतिनिधि र स्वयंसेवी युवाहरूले घाट क्षेत्रमा सुरक्षा नियन्त्रण, भीड व्यवस्थापन र पानीमा सजगता अपनाउन आग्रह गरिरहेका छन्।
सुनसरी जिल्ला प्रशासनले राति सुरक्षा व्यवस्था, जल सतह निगरानी र आकस्मिक उद्धार टोली तैनाथ गरेको जनाएको छ।
Discussion about this post