लायन्सद्धारा १५ लाखको लागतमा राष्ट्रिय माविमा चिल्ड्रेन पार्क निर्माण

इटहरी । लायन्स क्लबले इटहरी वडा नं. १ मा सञ्चालित श्री राष्ट्रिय माध्यमिक विद्यालयका विद्यार्थीका निम्ति निर्माण गरिएको चिल्ड्रेन पार्कको विहीबार उद्घाटन गरिएको छ । विद्यालयका साना विद्यार्थीका निम्ति १५ लाख ५१ हजार रुपैयाँको लागतमा निर्माण गरिएको चिल्ड्रेन पार्कको उद्घाटन लायन्स क्लब डिस्ट्रिक ३२५ सि का डिस्ट्रिक गर्भनर बबरजंग थापाले गरे ।
लायन्स क्लब अफ इटहरी मनकामना र लायन्स क्लब अफ इटहरी न्यू भिजनद्दारा निर्मित चिल्ड्रेन पार्क निर्माणमा ११५ जना दाताले आर्थिक सहयोग गरेको जानकारी दिइयो । सोही चिल्ड्रेन पार्क उद्घाटनका क्रममा लायन्स क्लब अफ इटहरी मनकामना र लायन्स क्लब अफ इटहरी न्यू भिजनले संयुक्त रुपमा एक लाख रुपैयाँको अक्षयकोष समेत स्थापना गरेको छ । संस्थाले अतिरिक्त क्रियाकलापमा उत्कृष्ट हुने चार जना विद्यार्थीलाई वर्षेनी पुरस्कार वितरण गर्ने गरि अक्षयकोष खडा गरेको प्रधानाध्यापक सरनकुमार बस्नेतले बताए ।सोही क्रममा लायन्स क्लबले विद्यालयलाई एक थान साउण्ड सिस्टम पनि वितरण गरिएको चिल्ड्रेन पार्क निर्माण समितिका संयोजक भूपराज पुरीले बताए ।
विद्यालयको ७० औं वार्षिकोत्सवको अवसरमा भएको चिल्ड्रेन पार्क समुद्घाटन कार्यक्रममा विशेष योगदान गर्ने २५ जना व्यक्तित्वलाई सम्मान समेत गरियो । कार्यक्रममा लायन्स क्लब अफ इटहरी मनकामनाका अध्यक्ष सिनेट रिजाल, लायन्स क्लब अफ इटहरी न्यू भिजनका अध्यक्ष सुरेशप्रसाद धमला, विद्यालय व्यवस्थापन समितिका अध्यक्ष कोविदजंग कार्कीलगायतले बोलेका थिए । कार्यक्रम अन्तर्गत शुक्रबार राष्ट्रिय मावि आइडल सिजन वानको फाइनल प्रतिस्पर्धा हुनेछ । यस्तै, शनिबार विद्यालयको वार्षिकोत्सवका साथै पूर्व विद्यार्थीद्धारा निर्माण गर्न लागेको सभाहलको सिलन्यास गरिने कार्यक्रम तय भएको छ ।