इनरुवा । सुनसरी निर्वाचन क्षेत्र नम्बर–३ मा यसपटकको चुनावी परिणामले पुराना राजनीतिक समीकरणलाई उल्ट्याएको छ। राष्ट्रिय स्वतन्त्र पार्टी (रास्वपा)का उम्मेदवार अशोककुमार चौधरीले उल्लेखनीय मतान्तरसहित विजय हासिल गर्दै क्षेत्रको प्रतिनिधित्व गर्ने अवसर पाएका छन्।
निर्वाचन परिणामअनुसार चौधरीले ४७ हजार ४२१ मत प्राप्त गरे। उनका निकटतम प्रतिस्पर्धी नेपाली कांग्रेसका नेता विजयकुमार गच्छदारले २० हजार ५०१ मत मात्रै पाए। यसैगरी २०७९ सालमा यही क्षेत्रबाट विजयी भएकी नेकपा एमालेकी भगवती चौधरी तेस्रो स्थानमा रहँदै १५ हजार ८३ मतमा सीमित भइन्।
सुनसरी–३ लामो समयसम्म कांग्रेस नेता गच्छदारको बलियो पकड रहेको क्षेत्र मानिन्थ्यो। २०४८ सालदेखि २०७४ सालसम्म उनले निरन्तर यहाँ प्रभाव जमाएका थिए। तर २०७९ सालको आम निर्वाचनमा एमालेकी भगवती चौधरीले उनलाई पराजित गर्दै त्यो प्रभाव तोडिदिएकी थिइन्। पराजयपछि ‘अन्तिम पटक’ भन्दै गच्छदार पुनः चुनावी मैदानमा उत्रिएका थिए। मतदातासँग उनले आफूलाई अन्तिम अवसर दिन आग्रह गरे पनि यसपटक मतदाताले नयाँ विकल्प रोज्दै रास्वपाका चौधरीलाई विजयी बनाए।
थारू तथा चौधरी समुदायको उल्लेख्य बसोबास रहेको यस क्षेत्रमा यसपटक पनि मुख्य प्रतिस्पर्धा सोही समुदायका उम्मेदवारबीच केन्द्रित थियो। गच्छदार आठौँ पटक चुनाव लड्दै थिए भने एमालेकी भगवती चौधरी पनि अघिल्लो जित दोहोर्याउने अभियानमा थिइन्। तर दुवै पुराना प्रतिस्पर्धीलाई पछाडि पार्दै रास्वपाका चौधरीले फराकिलो मतान्तरले जित हात पारे।
यसअघि २०७९ सालको चुनावमा भगवती चौधरीले गच्छदारको लामो अपराजित यात्रालाई करिब ५ हजार मतले रोकिदिएकी थिइन्। यसपटक भने गच्छदार २६ हजार ९२० मतान्तरले पराजित भए भने भगवती चौधरी ३२ हजार ३३८ मतान्तरले पछि परिन्।
यो परिणामसँगै १२ पटकसम्म मन्त्री बनेका गच्छदारको सक्रिय राजनीतिक यात्रामा पनि नयाँ मोड आएको विश्लेषण भइरहेको छ। आफ्नो राजनीतिक जीवनमा उनले कांग्रेस छाडेर मधेशी जनअधिकार फोरम हुँदै लोकतान्त्रिक फोरमसम्मको यात्रा गरेका थिए। २०७४ सालमा पुनः कांग्रेसमा फर्किएर चुनाव जितेका गच्छदारको प्रभाव भने पछिल्ला दुई चुनावमा कमजोर बन्दै गएको देखिएको छ।
यस क्षेत्रमा अन्य दलहरूबाट पनि उम्मेदवार मैदानमा थिए। नेकपाबाट दुर्गेश चौधरी, श्रम संस्कृति पार्टीबाट रामप्रसाद सदा, समावेशी समाजवादी पार्टी नेपालबाट किशोरकुमार विश्वास तथा राष्ट्रिय प्रजातन्त्र पार्टी (राप्रपा)बाट घनश्याम गुरुङले उम्मेदवारी दिएका थिए। तर उनीहरू कसैले पनि जमानत जोगाउन सकेनन्।
इटहरी उपमहानगरपालिका–पचरुखीका स्थायी बासिन्दा अशोककुमार चौधरीको शैक्षिक योग्यता १२ कक्षासम्म रहेको छ। उनी २०७९ सालमा रास्वपाबाट समानुपातिक सांसद बनेका थिए। रास्वपाका केन्द्रीय सदस्यसमेत रहेका चौधरी युवा, खेलकुद तथा सामाजिक विकासका क्षेत्रमा सक्रिय मानिन्छन्। पारदर्शिता र उत्तरदायित्वको पक्षमा बोल्दै आएका उनले यसपटक पुराना शक्तिशाली प्रतिस्पर्धीलाई पराजित गर्दै सुनसरी–३ को प्रतिनिधित्व गर्ने जिम्मेवारी प्राप्त गरेका छन्।
Discussion about this post