काठमाडौँ । प्रतिनिधिसभा सदस्य निर्वाचनको सुरक्षाका लागि अस्थायी रूपमा भर्ना गरिएका निर्वाचन प्रहरीहरूको कार्यअवधि समाप्त भएको छ। नेपाल प्रहरीले ४० दिनसम्म निर्वाचन सुरक्षामा खटाउन १ लाख ३३ हजार ९८० जना र सशस्त्र प्रहरी बलले १५ हजार ११० जना गरी कुल १ लाख ४९ हजार ९० जना निर्वाचन प्रहरी परिचालन गरेका थिए।
फागुन २१ गते प्रतिनिधिसभा सदस्य निर्वाचन शान्तिपूर्ण रूपमा सम्पन्न भइसकेको छ भने मतगणनाको परिणाम पनि सार्वजनिक भइसकेको छ। अब निर्वाचनमा खटिएका प्रहरीलाई औपचारिक रूपमा बिदाइ गर्ने तयारी भइरहेको छ। नेपाल प्रहरीका प्रवक्ता डीआईजी अवि नारायण काफ्लेका अनुसार देशभरका निर्वाचन प्रहरीलाई फागुन २८ गते ‘धन्यवाद पत्र’ प्रदान गर्दै बिदाइ गरिनेछ।
यसैगरी, सशस्त्र प्रहरी बलले पनि सोही दिन आफ्ना तर्फबाट परिचालित निर्वाचन प्रहरीलाई बिदाइ गर्ने जनाएको छ। सशस्त्र प्रहरी बलका प्रवक्ता डीआईजी विष्णु प्रसाद भट्टका अनुसार निर्वाचन सुरक्षामा खटिएका सबैलाई बिहीबार औपचारिक रूपमा बिदाइ गरिने कार्यक्रम तय गरिएको छ।
निर्वाचन सुरक्षामा ४० दिन खटिएका निर्वाचन प्रहरीलाई सरकारले ३४ हजार ७७६ रुपैयाँ पारिश्रमिक उपलब्ध गराएको छ। यसबाहेक रासन तथा आवतजावतका लागि ८४६ रुपैयाँ थप तयारी खर्च दिइएको छ। साथै, चार दिनका लागि दैनिक ३०० रुपैयाँका दरले खाजा खर्च पनि उपलब्ध गराइएको छ। पोसाकका लागि छुट्टै रकमसमेत दिइएको प्रहरीले जनाएको छ। प्रहरीका अनुसार धेरैजसो निर्वाचन प्रहरीले सेवा–सुविधा प्राप्त गरिसकेका छन् भने केहीले प्राप्त गर्ने प्रक्रियामा रहेका छन्।
निर्वाचन सुरक्षामा परिचालन गरिएका यी प्रहरीका सेवा–सुविधामा करिब ७ अर्ब ८३ करोड रुपैयाँ खर्च भएको सुरक्षा अधिकारीहरूले बताएका छन्। यसमध्ये नेपाल प्रहरीले मात्रै करिब ७ अर्ब १३ करोड २५ लाख रुपैयाँ खर्च गरेको छ भने सशस्त्र प्रहरीले करिब ७० करोड रुपैयाँ खर्च गरेको छ।
निर्वाचन ड्युटीका क्रममा ११ जना निर्वाचन प्रहरीको मृत्यु भएको छ भने दुर्घटनामा परी नेपाल प्रहरीका एक असईले ज्यान गुमाएका छन्। ड्युटीकै क्रममा मृत्यु भएका निर्वाचन प्रहरीका परिवारलाई सरकारले बीमा बापत २० लाख रुपैयाँ उपलब्ध गराउने व्यवस्था रहेको प्रहरी प्रवक्ता काफ्लेले जानकारी दिएका छन्।
Discussion about this post