दसगजामा भारतीय सीमा सुरक्षा बल (एसएसबी)ले गरे पोस्ट् निर्माण

सन्तोष मेहता/विराटनगर।
अन्तर्राष्ट्रिय कानुन उल्लंघन गर्दै विराटनगर महानगरपालिकाको सिमावर्ती दसगजा क्षेत्रमा भारतीय सीमा सुरक्षा बल (एसएसबी)ले पोस्ट् निर्माण गरेको पाइएको छ । कूटनैतिक मर्यादा र कानुनविपरीत विराटनगर महानगरपालिका–१६ दरैया र भारत जोगवनीस्थित टिकुलिया बस्तीको बीचमा लगभग एक महीनाअघि एसएसबीले सुरक्षा पोस्ट् बनाएको हो । स्थायी हिसाबले बनाइएको उक्त पोस्ट्मा २४ घण्टा नै हतियारसहितका एसएसबीका जवान बस्न थालेका छन् । उनीहरुले दसगजामै बसेर चेकजाँच गर्दै आफ्ना गतिविधी र कामकारबाही सञ्चालन गरिरहेका हुन् । दुई देशीय सिमानामा कुनै पनि संरचना बनाउन र गतिविधी गर्न नपाइने अन्तर्राष्ट्रिय कानुन मिचेर एकलौटी ढंगबाट एसएसबीले सुरक्षाका नाममा पोस्ट् खडा गरेर गतिविधी गरिरहेको हो । काठ र कर्कटपाताको प्रयोग गरेर संरचना गर्दै अड्डा जमाएको एसएसबीले सीमा क्षेत्रका नेपालीलाई धेरै दुःख दिइरहेको गुनासो स्थानीयको छ । स्थानीय अगुवा मनोज खड्काले सीमा क्षेत्रमा भारतीय पक्षको दादागिरी बढ्दा पनि नेपाल सरकारले कुनै प्रतिक्रिया नजनाएको गुनासो गरे। एसएसबीले सुरक्षा पोस्ट् बनाएर दसगजा अतिक्रमणलाई प्रोत्साहन गरिरहेको भनाइ छ । विराटनगर–१६ का वडाध्यक्ष मनोज सुब्बाले खुला सीमाको फाइदा उठाउँदै एसएसबीले दसगजामा आफूखुसी पोस्ट् बनाएको बताए । उनले नेपाली भूमिमा गिद्धे नजर लगाइरहेको भारतीय पक्षबाट दसगजाकै अस्तित्व मेटाउने प्रयास भइरहेको उल्लेख गरे । सुब्बाले सुरक्षा पोस्ट् नै बनाएर दसगजाबाट भारतले नेपालको गतिविधी नियाल्ने काम गरिरहेको हुनसक्ने बताए । एसएसबीको पोस्ट् हटाएर दसगजा खाली गर्न सरकारले तत्काल पहल गर्नुपर्ने माग गरे । मोरङका प्रमुख जिल्ला अधिकारी काशीराज दाहालले दसगजा क्षेत्रभित्र एसएसबीले पोस्ट् बनाएको विषयमा बुझ्ने काम भइरहेको बताए । दसगजामा दुवै देशका तर्फबाट कुनै पनि संरचना बनाउन नपाइने भएकाले तत्काल हटाउनका लागि पहल थाल्ने उनको भनाइ छ । पोस्ट् हटाउनलाई सुरुमा सशस्त्र प्रहरीले एसएसबीसँग समन्वय गर्ने बताउँदै प्रजिअ दाहालले यस विषयमा भारतको अररिया जिल्लाका डिस्ट्रिक मेजिस्ट्रेटसँग पनि गम्भीर ढंगले कुरा राखिने जानकारी दिए । भारतीय समकक्षीसँग कुरा राख्दा पनि समस्याको समाधान नभएमा गृह मन्त्रालयमार्फत कूटनैतिक तवरबाट एसएसबीको पोस्ट् हटाउने विषयमा पहल हुने उनको भनाइ छ ।