नेपाली कांग्रेस इनरुवा नगरकार्य समितिको विरोधसभालाई सम्बोधन गर्दै मेयर मेहताले संसद् विघटन अलोकतान्त्रिक र असवैधानिक भएको हुँदा सर्वोच्चको आदेश आए आफू चुनावसँग नडराउने बताएका हुन् ।

उनले भने, ‘चुनाव भयो भने दुर्बिनबाट हेर्दा पनि कम्युनिस्ट भेटिँदैनन् ।’ हिजोको स्थानीय तहको निर्वाचनमा तत्कालीन एमाले र माओवादीले मिलेर चुनावी मैदानमा आएका थिए तैपनि सुनसरीमा हात मिलाउन सकेनन् भने अब उनीहरु आफैँ दुई कित्तामा उभिएकाले कुनै पनि हालतमा कांग्रेससँग नसक्ने भएको हुँदा कांग्रेस चुनावमा नडराईकन यदि चुनाव भयो भने कांग्रेस अग्रपंक्तिमा रहने उनले बताए ।

संविधानको रक्षाको लागि सडकमा उत्रिएको भन्दै उनले गलत प्रचारवाजी भइरहेको बेला नेपाली कांग्रेसले कम्युनिस्ट सरकारमा नजाने दाबी गरे । नेपालको संविधानको मर्म र भावना बुझेर अगाडि बढ्ने र सर्वोच्चको आदेशअनुसार नेपाली कांग्रेसले जनताको माझ जाने विश्वास व्यक्त गरें ।

उनले भने, ‘सर्वोच्चले चुनावको घोषणा गर्‍यो भने जनतामाझ गएर नेपाली कांग्रेसले भोट माग्छ, गरेका गल्तीहरुको क्षमा माग्दै उठ्बस गर्छ । लोकतन्त्र रक्षाको लागि कांग्रेस सदैव तयार रहेकाले नेपाली जनताको पक्षमा वकालत गर्नेछ ।’

अबको चुनावमा कम्युनिस्टलाई भोट दियो भने कहिल्यै पनि लोकतन्त्र, संघीयता र संविधानको रक्षा नहुने उनले बताए । नेपाली जनतालाई आवश्यकता परेको बेला र बदलिँदो परिस्थितिमा व्यवस्था परिर्वतन भएको खण्डमा नेपाली कांग्रेस जनताको पक्षमा उभिएको उनको तर्क थियो ।

जिल्ला पार्टी कार्यालय अगाडिबाट विरोध र्‍याली सुरु गरी लोकतान्त्रिक चोकमा कोणसभामा परिणत भएको थियो । नगर सभापति राजन मेहताको अगुवाइमा निकालिएको विरोध र्‍यालीमा सयौंको संख्यामा सहभागिता रहेको थियो ।

नेपाली कांग्रेसका जिल्ला सदस्य तथा इनरुवा नगरपालिका वडा नम्बर–२ का वडा सदस्य रञ्जेश भट्टराईले नेपाली जनतालाई कम्युनिस्ट सरकारले गुमराहमा राखेको बताए ।

नेपाली कांग्रेसको नेतृत्वमा ल्याएको संविधानलाई रक्षा गर्नुपर्ने साटो कम्युनिस्टहरुले सखाप पार्न खोजेको आरोप उनले लगाए । संसद् विघटन गरेर महाविद्वान भनाउँदाहरुले अहिले राम्रो काम गरेर सास्तो लोकप्रियता कमाएकोप्रति नेपाली कांग्रेसले देशभरि अन्दोलन गरिरहेको बताए ।

विरोधसभामा इनरुवा नगर कार्यसमितिका पदाधिकारी, तरुण दल, महिला, युवा, विद्यार्थीलगायतको सहभागिता रहेको थियो । कार्यक्रम इनरुवा नगर कार्यसमितिका सचिव रोशन खड्काले सञ्चालन गरेका थिए ।