सुनसरीका सबै वडामा प्रतिनिधिसभा विघटनविरुद्ध काँग्रेसको ब्यापक बिरोध प्रदर्शन

सुरेन्द्र मेहता / इनरुवा । प्रधानमन्त्री केपी शर्मा ओलीले प्रतिनिधिसभा विघटन गरेपछि आन्दोलित रहेको नेपाली काँग्रेस सुनसरीले बिहिबार जिल्लाका सबै वडामा व्यापक रुपमा विरोध प्रदर्शन गरेको छ ।
प्रधानमन्त्री केपी शर्मा ओलीले गरेको प्रतिनिधिसभा विघटनको कदमलाई असंवैधानिक र अलोकतान्त्रिक ठहर गर्दै बिहिबार सुनसरीको सम्पूर्ण वडा तहमा व्यापक रुपमा बिरोध प्रदर्शन गरिएको नेपाली काँग्रेस सुनसरीका सभापति राजिव कोइरालाले जानकारी दिए ।
यस अघि नेपाली कांग्रेस सुनसरीले पुस १३ गते जिल्लाको सबै निर्वाचन क्षेत्रमा, पुस २५ गते प्रदेशसभा निर्वाचन क्षेत्रमा, माघ ३ गते पालिकाहरुमा विरोध प्रदर्शन गरेका थिए ।
संविधानमा भएको ब्यवस्था प्रतिकुल, जनभावना विपरीतको कार्य विरुद्ध नेपाली कांग्रेस एकमत रहेको भन्दै व्यापक सहभागी भएर असंवैधानिक र अलोकतान्त्रिक कदमका विरुद्ध ऐक्यवद्धता प्रकट गर्न बिहिबार सुनसरीका सबै वडा तहमा बिरोध प्रदर्शन कार्यक्रम सम्पन्न गरिएको काँगे्रस सभापति कोइरालाले जानकारी दिए ।
नेपाली काँग्रेस इनरुवा नगर समितिको आव्हानमा इनरुवाको १० वटै वडामा नेपाली काँग्रेसले प्रधानमन्त्री केपी शर्मा ओलीको कदम बिरुद्ध बिरोध प्रदर्शन गरिएको नेपाली काँग्रेस इनरुवा नगर समितिका सभापति राजन मेहताले जानकारी दिए । काँग्रेस इनरुवाको वडा स्तरीय बिरोध कार्यक्रम अन्र्तगत इनरुवा वडा न. १ देखी १० न. वडाहरुमा रयाली निकाल्दै वडा परिक्रमा गरेको थियो । १० वटै वडामा छुट्टा छुट्टै र्याली परिक्रमा गरेपछि फेरि र्याली कोण सभामा परिणत भएको थियो ।
कोण सभालाई सम्बोधन गर्दै काँग्रेसका नेताहरुले बर्तमान कम्युनिष्ट सरकार भ्रष्टाचारमा लिप्त भएको आरोप लगाएका थिए । कोण सभामा बोल्ने नेताहरुले जनताको पिरमर्कालाई सरकारले कुनै पनि किसिमले ध्यान नदिएको बताउदै बर्तमान सरकार र नेपाल कम्युनिष्ट पार्टीको आयु लामो नरहेको नेताहरुको जिकिर थियो ।
नेपाली काँग्रेस इनरुवा २ न. वडा समितिका सभापति भुपेन्द्रसिंह यादवको नेतृत्वमा उल्लेखनिय कार्यकर्ताहरुको सहभागिता वडामा बिरोध प्रदर्शन कार्यक्रम गरिएको काँग्रेस वडा समितिका सचिव सन्तोष शर्माले जानकारी दिए ।
इनरुवा २ स्थित नेपाली काँग्रेस २ न. वडा समितिको कोण सभालाई सम्बोधन गर्दै विघठित प्रतिनिधी सभाका सदस्य सिताराम मेहताले प्रधानमन्त्री ओलीले प्रतिनिधी सभा विघटन गरेर मुलुकमा संकट खडा गरेको बताए । यस्तै सरकारले कोरोना महामारी तथा लकडाउनको समयमा खरिद गरिएको औषधिमा समेत भ्रष्टाचार गर्न नछाडेको उनले बताए । यता इनरुवाको १० वटै वडामा संचालित बिरोध कार्यक्रमको अनुगमन गरेका नेपाली काँग्रेस इनरुवाका नगर सभापति तथा इनरुवा नगरपालिकाका नगर प्रमुख राजन मेहताले राष्ट्रबादको नाम लिएर भोट लिएको कम्युनिष्ट सरकार आज जनताको बिचमा देखिन छाडेको प्रतिक्रिया दिए । मेहताले जनतालाई खाडलमा पारेर सरकारको भ्रष्टाचारतर्फ ध्यान केन्द्रित रहेको प्रदेशपना डट कम लाई बताए ।

उनले बर्तमान सरकारले नेपाली जनतामाथि करको बोझ थुपारेको समेत आरोप लगाएका छन् । त्यसैगरी नेपाली काँग्रेसले सुनसरीको धरान उपमहानगरपालिका, इटहरी उपमहानगरपालिका, रामधुनी, इनरुवा, दुहवी, बराहक्षेत्र नगरपालिका, भोक्राहा नरसिंह, कोशी, गढी, बर्जु, हरिनगर र देवानगंज गाउँपालिकाका सम्पूर्ण वडाहरु प्रधानमन्त्री ओलीको कदम बिरुद्धमा व्यापक जनप्रदर्शन गरेको हो ।